Parlamentario Ricky Hoek (MEP):
ORANJESTAD (AAN): Ultimo simannan por a tuma nota di un semi-protesta di algun centro di cuido di mucha tocante e ley cu gobierno a introduci. Pero mas crucial ta e conmocion grandi cu tin pa tur loke ta sosodiendo den e centronan di cuido di mucha (crêche) riba nos isla.
Casonan increibel cu no mag di sosode mas awor na aña 2024. Actonan cu ta bay contra tur Derecho di Mucha y tambe di e ordenanza nacional di cuido di mucha (kinderopvang), asina Parlamentario di Fraccion di MEP, Ricky Hoek a duna di conoce.
𝗦𝘁𝘂𝘂𝗿𝗴𝗿𝗼𝗲𝗽 𝘆 𝗖𝗼𝗺𝗶𝘀𝗶𝗼𝗻 𝟮𝟬𝟭𝟱-𝟮𝟬𝟭𝟳
Di aña 2015 pa 2017 tabatin un stuurgroep y comision cu a traha riba un concepto di Manual di Exigencia di Calidad (Handleiding Kwaliteitseisen) pa sostene e Ley di Cuido di Mucha (Kinderopvang). E stuurgroep y comision tabata consisti for di e trahadonan pedagogico (leidsternan) di e centronan di cuido di mucha (crèche) e tempo ey y cu awendia ainda nan tey.
E leidsternan cu tin añanan di experiencia den veld, a analiza, propone y aproba e exigencianan di calidad pa lo cual un crèche mester cumpli cu ne.
Un di e exigencianan di calidad ta pa introduci un ‘proporcion mucha-trahado pedagogico’ (kind-leidster ratio) cu ta un exigencia importante pa garantisa seguridad di e muchanan. Den e temporada 2015 pa 2017 e leidsternan a aproba e kind-leidster ratio. Lastimamente, algun di e trahadonan pedagogico cu tabata forma parti di e stuurgroep y comision, actualmente ta bringando dicho exigencia di calidad, Hoek a indica.
𝗣𝗿𝗼𝗽𝗼𝗿𝗰𝗶𝗼𝗻 𝗺𝘂𝗰𝗵𝗮-𝘁𝗿𝗮𝗵𝗮𝗱𝗼 𝗽𝗲𝗱𝗮𝗴𝗼𝗴𝗶𝗰𝗼
E exigencia di calidad di proporcion mucha-trahado pedagogico (kind-leidter ratio) tin su beneficionan tanto pa e mucha como e trahador pedagogico. Un di e beneficionan ta garantia di seguridad di e mucha. E beneficio aki por aporta na e calidad di cuido, guia y stimulacion cu e creche ta brinda. E proporcion aki ta reduci e stress halto bou di e trahadonan pedagogico. Ademas, ta zorg pa no traha cu un grupo mucho grandi pa asina por monitoria e desaroyo di cada mucha mihor.
𝗢𝗿𝗱𝗲𝗻𝗮𝗻𝘇𝗮 𝗡𝗮𝗰𝗶𝗼𝗻𝗮𝗹
Parlamentario Hoek a sigui splica cu e Ley di Kinderopvang a pasa Parlamento di Aruba na juni 2017 y cu den 1 aña lo mester a implement’e. Tabata tin algun adaptacion den dicho ley y riba 15 di augustus 2023, e Ley di Cuido di Mucha (Landsverorderning Kinderopvang) a drenta na vigor riba isla di Aruba. Esaki ta haci cu tur centro di cuido di mucha mester cumpli cu e ley aki y tambe loke ta e manual di exigencianan di calidad.
𝗗𝗲𝗰𝗶𝘀𝗶𝗼𝗻 𝗱𝗶 𝗺𝗮𝘆𝗼𝗿𝗻𝗮𝗻
Mayornan tin un rol importante di puntra e trahado pedagogico principal di e centro di cuido si nan ta cumpli cu tur of mayoria calidad di exigencia y si tambe con e centro ta garantisa seguridad, cuido y desaroyo optimal di e yiu. Den caso cu un mayor no ta un situacion cu no ta corecto den e centro di cuido di mucha, por tuma contacto cu sea Departamento di Mucha y Hoben, Bureau Sostenemi of Jeugd en Zedenpolitie pa avisa e instancia di e sucedidonan, Parlamentario Ricky Hoek a declara.
