ORANJESTAD (AAN) – Tur informacion cu ta recore mundo y sigur Aruba, Corsow y Bonaire tocante omicron, ta cu e virus aki ta serio y sumamente contagioso.
Na mesa di redaccion di DIARIO a drenta algun yamada di ciudadanonan cu ta den edad di 40 plus, pa nan tambe wordo teni na cuenta pa “walk in” mas pronto posible, pa tuma nan booster.
Ta personanan cu tin e dos dosis di Pfizer, contra covid-19, pero cu e periodo di 6 pa 8 luna di proteccion cu a wordo bisa cu e vacunanan tin, of a pasa caba of ta cerca di vence.
Un di e ciudadanonan aki a señala cu e grupo aki di 40 plus ta basta grandi, y ta e grupo cu kizas ta mas activo den e mercado laboral; hopi di nan (podise den su mayoria), ta cabes di famia cu yiunan adolescente, pues cu tin un responsabilidad grandi como trahado y como tata y mama.
Pero no menos importante, den e grupo di edad aki ta, cu meymey tin hende cu tendencia na malesa cronico, of tine caba, y cu como nan periodo di proteccion door di e prome dos dosis a pasa of ta pasando, e noticia di omicron y con contagioso e ta, tin nan hopi preocupa.
Esaki ta nifica cu tambe ta importante pa nan subi nan defensanan contra omicron, pasobra miho tin un nivel di proteccion di 70 pa 80% cu no tin ningun, pasobra e dos dosisnan prome ta menguando su funcion, y e omicron ta mas residente na esakinan cu na e booster.
Kiermen, cu pa un segmento grandi di e mercado laboral y pa un cantidad importante di famianan cu ta lantando, ta masha importante pa esnan di 40 plus den nos comunidad, tambe haya e di tres shot, kiermen e booster. Nan ta urgi gobierno-DVG pa habri e porta di e vacunacion di e tres dosis pa e 40 plussers mas pronto posible. Mescos cu nan a tuma e prome y di dos vacuna di Pfizer, nan ta spera cu man habri e booster.
