Gregory Fung-A-Fat, United Farms:
*Manera infrastructura di tereno y electricidad
ORANJESTAD (AAN)— Papiando di desafionan cu ainda mester atende riba seguridad di cuminda, Gregory Fung-A-Fat di United Farms, a sigui bisa den su entrevista cu DIARIO, cu si aworaki tin e parti financiero bon hinca den otro, pero e base di structura di tereno pa produci no tey, anto ta bira dificil.
“Pesey, semper mi ta bisa cu nos mester mira tur esaki y palabra cierto cosnan y pone fechanan; pasobra si no, nunca nos ta yega na dje.
“Mi ta kere cu tereno ta di tempo di Covid caba nos a trec’e na mesa. Cuater aña pasa enberdad, pero nos no a tende movecion riba dje. A wordo bisa varios momento cu nos ta bay wordo yama na mesa, pa wak ideanan cu nos por move. Esey ta uno, pero electricidad ta algo cu constantemente nos tin problema cu ne, y esnan cu ta produciendo comercialmente, hopi biaha tin problema cu electricidad y nan no tin e infrastructura pa ki demanda nan mester, pues sin tackle e problemanan ey nos ta keda draai, draai, y mesun cos.
“Nos tin cu bisa ‘ok, kico nos mester pone prioridad, ki dia e mester ta cla y ‘werk uit’. Mescos cu nos a haci cu awa; el a tuma tempo, pero WEB tin un tarifa special pa cunukero. Pero si nan por a haci’e di con otronan no por haci’e?” Gregory Fung-A-Fat a menciona.
El a wordo puntra di con no ta pensa riba e alternativa panel solar den e tereno aki di agricultura, y el a contesta cu tin un discusion andando riba esaki.
“Si bo kier energia sostenible y seguridad di cuminda pa un termino largo bo tin cu duna e oportunidad y ultimo biaha cu mi a sinta cu DIP, mi a bisa cu enberdad ley ta bisa cierto cosnan pero e minister por yega na mesa y bisa cu nan ta bay haci un beleid aworaki mientras tanto cu nos ta cambiando e ley. Si nos tin cu warda ora e ley cambia, aki diez aña mi ta kere nos ta den e mesun posicion papiando riba mesun tema”, Gregory Fung-A-Fat a señala.
