Herrick Henriquez, director di ATIA:
ORANJESTAD (AAN) – Herrick Henriquez, Director di ATIA (Asociacion di Comercio y Industria di Aruba), den entrevista cu DIARIO a duna di conoce cu siman pasa ATIA a sinta cu Minister di Labor, Integracion y Energia Glenbert Croes, pasobra e preocupacion cu tin tocante e scarcedad di trahado pa sector di Horeca, ta birando cada dia mas grandi.
Henriquez a bisa cu e mercado laboral aki no ta hayando empleado den tur sector. ATIA a wak cu sector hotelero a saca un foro cu AFBA (Food & Beverage) dos siman pasa, unda nan a invita e gremio comercial tambe, y mescos cu aña pasa nan a sinta tambe cu otro gremionan pa bin cu un par di solucion, of sugerencianan, pa corto y largo termino, y esey nan a presenta na Minister di Labor y su team.
Henriquez a reitera cu e preocupacion ta grandi den tur sector, no solamente den e sector turistico pero nan ta wak mas den esaki pasobra tin hotelnan nobo ta habriendo y eynan por wak cu e sector ta mas agresivo riba mercado den buskeda di trahado. Tin companianan cu no tin drivers, no tin trahado pa Warehouse, ni pa traha den branding, of pa yena reki. Den pasado, esnan educa pa cargonan mas halto tabata dificil pa haya pero awo ta esnan cu ta traha riba vloer ta un problema basta grandi ta andando den tur sector.
“Den construccion tambe por mira esaki. Construccion ta parti di e board di ATIA y cada dos siman nos ta haya un update di e gremio y e tin un reto hopi grandi. Un parti di e reto ta pa haya empleadonan pasobra tin hopi construccion ta bayendo y hopi contratista tin mas subcontratista chikito. E sector di construccion a cambia. Prome tabata tin e companianan di construccion grandi cu ta emplea hopi hende, pero awo ta emplea menos pasobra tin mas contratista. Pues, nan mes no por haya hende y nan ta obliga di busca contratistanan awo. Eynan por wak un shift den e mercado y sigur den e mercado hotelero tambe ta asina cu nan ta traha cu hopi contratista. Pues e parti ey nos kier mira un solucion p’e”, director di ATIA a subraya.
