DOW ta traha un planificacion a base di e grado di prioridad
ORANJESTAD (AAN): Diaranson 7 di augustus, Prome Minister Evelyn Wever-Croes hunto cu su ekipo a reuni cu funcionarionan di Dienst Openbare Werken (DOW) pa planifica e trabounan di asfalt cu mester bay tuma luga. Prome Minister a duna di conoce cu e aña aki tin mas placa riba e presupuesto pa por haci inversion den nos careteranan y p’esey DOW ta haciendo planificacion.
Pa trabounan aki na Aruba tin retonan entre otro tin un planta so di asfalt consecuentemente tin tardansanan. Otro reto ta e camindanan di santo cu ta poni riba lista pa bay asfalta pero ta resulta cu tin por ehempel palonan di luz meymey unda e caminda mester bin, of cura di casnan ta riba e caminda of tuberia cu mester pasa ainda. Por lo tanto no ta tur e retonan ta den man di DOW pero si nan ta atende cu esakinan y e caminda ta keda den e planning.
Tambe DOW a trece e resultado di e estudionan y investigacion cu nan a haci riba con den un periodo largo por drecha tur caminda na Aruba. Eynan a yega na e conclusion cu di awor pa 15 aña lo mester por inverti 17 miyon florin cada aña den cua periodo asfalta e camindanan di santo y por drecha tur cu e camindanan cu tin mester wordo drecha. Naturalmente, pa esey mester mas placa. Pa awor aki, pa e aña aki, tin 17 miyon florin disponibel pa traha riba careteranan di santo pa haci nan di asfalt y pa traha riba e mantencion di e careteranan di asfalt cu ta den mal condicion.
DOW ta aplica un sistema pa pone prioridad riba careteranan. Depende con malo e caminda ta, e costo di drecha un caminda di santo cada biaha, cuanto hende ta biba eynan y con frecuente e caminda ta wordo uza, y asina ta traha un planificacion a base di e grado di prioridad.
“Nos meta ta pa percura pa nos camindanan di santo bira asfalt y pa tur nos careteranan di asfalt den mal estado wordo drecha. No ta posibel pa haci tur na e mesun momento. Si tin mas fondo disponibel awor door di e capacidad financiero, pero na Aruba tin un limitacion di capacidad pa traha of drecha caminda cu asfalt. Pero e tin nos atencion y hunto cu DOW nos lo sigui enfrenta tur e retonan aki y nos lo percura pa e careterenan haya e atencion necesario”, Prome Minister a remarca.
