Bettina Maduro relaciona cu e tema di menopause:
ORANJESTAD (AAN): Bettina Maduro ta bezig for di algun tempo cu un proyecto caminda e ta dunando sosten y informacion na hende muhernan tocante e tema di menopause. Bettina ta un 'clinica; certified sex coach' y siman pasa el a organisa un charla relaciona cu e tema aki cu a haya un bon acogida.
Durante pandemia el a ripara cu hopi pareha tabata tin problema cu nan bida intimo y asina el a dicidi di haci un opleiding di dos aña na Los Angeles. El a pidi cierto permisonan pa asina e por a eherce e funcion ey.
Menopause tabata esun ultimo cu el a cuminsa cu ne pasobra e tabata kier enfoca pa e parehanan tin un bida sexual mas saludabel y pa nan comunica cu otro mas miho. Pero menopause a drenta aden na un forma masha drastico na Aruba y mundialmente, a remarca.
Asina el a cuminsa imparti charla den luna di october aña pasa cu sosten di Kiwanis Palm Beach cu a pone disponibel nan Clubhuis, unda el a ofrece tres charla completamente gratis.
E aña aki, Bettina Maduro a haci su Menopause Support Page riba Facebook, cual ta un grupo di sosten pa hende muhe cu ta pasando den menopause.
Menopause conoce varios fase. El a splica cu pre-menopause ta ora cu e hende muhe ta mira su menstruacion bon pero toch ta sinti dolornan straño ta cuminsa aparece manera ansiedad. Despues ta sigui e fase di perimenopause y ta unda ta mira e menstruacion di forma iregular, un luna si un luna no. Tin hende muher cu ta hay'e hopi pisa y despues pa dos luna e menstruacion ta disparce. Despues e ta bin bek.
E fase aki no ta nada agradabel ya cu mester meldziek pasobra ta sinti hopi dolor. Nan ta haya e mesun sintomanan manera 'hot flashes', hopi sodo anochi, ansiedad, depresion, entre otro.
El a indica cu pa yuda cu e sintomanan manera 'hot flashes' ta recomendabel pa bebe hopi awa.
Ora cu bo yega na 12 of 14 luna sin mira e menstruacion, "e ora bo sa cu bo ta den menopause". Pa constata bo situacion por haci un test di sanger. "Eynan ta caminda mi kier ranca e bell un rato pa asina e dokternan di cas ta mas consciente riba kico ta pasando".
Riba e facebook page por a ripara cu hopi hende muhe ta bisa cu nan dokter di cas no ta haci nan caso y masha tiki cu e dokter ta bisa cu ta bay yuda nan. Tin tratamento pa reemplaso di hormona cu por yuda bon. A remarca cu den tur caso, dokter di cas ta esun cu por yuda pasobra hende muhe ta perde su libido y nan hormonanan tambe ta cambia.
Segun Maduro tin terapia di hormona cu por yuda di inmediato y nan a haya tur cos bek. A enfatisa cu den cada caso ta dokter di cas tin cu manda e tratamento. Tin solucion di terapia di hormona, pero mester acerca dokter di cas, a remarca.
Ora cu hende muher ta drenta den menopause ta casi e mesun sintomanan. E proceso por dura entre 10 pa 15 aña te ora cu e menstruacion ta bay definitivamente. Ora cu caba cu menopause tin e parti positivo manera cu ya no ta mira e menstruacion mas, a splica.
Durante post menopause tambe ta presenta algun sintoma manera dolor di curpa, curason ta bati, cortizol ta lanta y ta haya ansiedad, depresion. Esaki por presenta manera un combo. Post menopause ta e final di tur cos.
Finalmente e a agrega cu dokter di cas ta esun cu por recomenda cual ta e miho tratamento den cada caso individual.
Dokternan mester por laga nan pashent haci nan test di hormona sin cu mester haya un verwijsbrief pa bay un ginecologo. Nan mes tambe por hacie pa asina sa den cual fase e pashent ta y wak sin por yuda nan cu terapia di hormona.
