Thrift Shop di Cruz Cora na San Nicolas a habri

*Ta bay bende paña pa haya fondonan pa sigui yuda esnan den necesidad

ORANJESTAD (AAN): Diamars mainta a tuma lugar apertura oficial die Thrift Shop den e Share and Care Outlet di Cruz Cora na San Nicolas.

Den un entrevista cu DIARIO Minerva Huizinga Santana di Cruz Cora y manager di e branch di San Nicolas a splica cu ta un dia hopi grandi.

El a splica cu nan sa haya hopi paña segunda mano den bon estado y hopi hende tabata puntra si Cruz Cora na San Nicolas tambe lo haya un bazaar manera cu tin na Dakota.

“Nos a pensa pa haci esaki y door di Coronavirus nos no a hacie anteriormente, pero awor e chens a yega pa nos habri e Thrift Shop”.

Nos a sortia e pañanan y nan ta den hopi bon estado, casi nobo, segun Huizinga Santana.

El a sigui bisa cu tres biaha pa siman na San Nicolas nan ta yuda personanan cu ta biba riba caya, adictonan y personanan cu ta pasa den duro cu algo di come.

“Nos kier sigui cu esaki y nos ta puntrando pa donacion pa nos por traha sopi y otro cuminda pa yuda e personanan aki den necesidad”.

Door cu esey no ta bayendo hopi bon nos ta cuminza bende paña pa asina haya fondo pa sigui cu e trabaonan di yuda hende, segun e manager di e Thrift Shop.

Huizinga Santana a sigui bisa cu Cruz Cora ta yuda e personanan aki cu pan y sopi, pero pan ta hopi caro y hopi biaha nan mester paga casi 250 florin pa haya un weya di sopi pa por duna 50 hende di come.

“Nos mes ta lucha tambe y traha algo na cas pa bin cune y Mariniers Kazerne tambe sa yuda nos pero nos tin mester di basta placa y pesey nos ta bay haci esaki, pa sigui cu nos trabao”, segun Huizinga, kende a indica cu e Thrift Shop ta habri tur Diamars di 9’or di mainta te cu 3’or di atardi, Diahuebs di 12’or di merdia te cu 4’or di atardi y riba e di dos Diasabra di cada luna, mainta.

Pa loke ta e ayudo pa e adictonan y personanan den dificultad, tur Dialuna y Diabierna di 10’or di mainta pa 12’or di merdia nan ta haya algo di come y Diaranzon ta e dia riba cual di 11’or di mainta te cu 1’or di merdia nan ta haya nan pan cu sopi.

Semper e empleadonan di Cruz Cora ta papia cu e personanan aki tambe un rato pa puntra con a bay cu nan.

“Nos tin 1 aña ta haci e trabao aki y nan ta respeta nos y e ta bayendo hopi bon”.

Esaki segun Huizinga kende a indica cu nan ta yuda masha hopi hende mes.

E ta calcula cu aña pasa nan a yuda mas cu 5000 hende.

Na e branch di San Nicolas tin alrededor di 10 boluntario cu ta traha cu hopi amor pa nan clientenan, e manager a indica.

“Sin nan nos no lo por logra asina tanto”.

Nan ta traha hopi duro tur ora cu nan por, incluyendo den weekend, segun Huizinga.

El a splica tambe cu tur prome Diahuebs di luna nan ta yuda mas tanto teenagers y otro mamanan hoben den necesidad, cu un asina yama ‘Menstrual Higiene Package’, esta despues cu nan inscribi tur luna nan ta haya un pakete cu articulonan di higiena personal.