Thomas Ruiz ta splica, detayadamente, e peligro di uza E-scooter riba caminda publico

*E vehiculonan aki no ta legisla na Aruba

*Aruba por pas aan e ley cu tin na Hulanda

ORANJESTAD (AAN)—Señor Thomas Ruiz, di Asociacion Rijscholen Aruba, el a referi na con peligroso uza step (E-scooter) riba caminda publico, por resulta, manera ta e caso di e dama cu a fayece dos dia atras.

Na prome lugar, Ruiz a expresa palabra di condolencia pa e famia di e fayecido y a bisa cu enberdad tabata tristo pa a habri e siman aki, cu e noticia di e nuebe morto den trafico y cu ta regarda uzo di e vehiculo aki. El a señala cu Asociacion di Rijscholen a trece e tema aki mas cu tres aña pasa, y na Merca nan ta alerta desde mas cu cinco aña pasa.

Ruiz a subraya cu nan a trece alerta tras di alerta, pero no ta nan so. Nan a haya potretnan di taxistanan cu nan a saca riba rotonde, hasta di un mama cu a mara su yiu riba un di e aparatonan aki.

“Pero te awe, no gobierno ni parlamento, a duna e atencion debido pa legisla e ley manera mester ta. Y no mester inventa e wheel. E ley aki ta legisla na Hulanda, no mas cu nos tin cu pas aan, na nos infrastructura”, Ruiz a comenta.

El a agrega cu na Hulanda e tipo di vehiculo aki, ta hinca den e rijbewijs examen, na Aruba e no ta hinca ainda.

“Dus, nos no sa ki mas haci. Ban wak awo ken ta bay move y cuminza cu iniciativa pa legisla esaki manera mester ta”, Thomas Ruiz a señala.

Pa splica pueblo con e asunto aki ta, el a señala cu e unico palabra conoci den ley, ta “step”. “Esey ta e coi hunga unda cu e mucha por rek su pia, e por core na cas, y p’esey e ta p’esey e ta cay bao e definicion di peaton. P’esey a wak e mama cu e yiu riba step cruza riba zebrapad.

“Pero desde cu nan a construi nan di motor, y nan a traha nan pa menor di edad y adulto, ey caba tin un problema, pasobra e ley cu nos tin ta anticua. Corda bon, e ultimo cambio den ley tabata na aña 2000, si mi no ta hera. Dus, mester pas an e ley aki. Corda bon, nos tin vehiculo electronico cu ta core sin chauffeur, nos leynan no ta apto pa e cos aki ainda, pero ta wordo importa, si! Pues, di aki, nos kier haci un suplica na instancianan concerni, Gobierno y Parlamento, pa busca un manera di legisla esaki mas lihe posible, pa e regla ta duidelijk tambe. Nos ta di opinion cu mester legisl’e den un definicion nobo y esey ta conta pa tur vehiculo nobo cu ta bin, mester regula speed, pasobra nan ta bin di fabrica cu 25 kilometer pa ora, pero sea e comerciante of e doño mes ta condicion’e cu e por mand’e na 60 cu 80 cu ta hopi mas peligroso. Y mester regula tambe unda e mag di wordo uza. Ora cu t’asina leu y e ley ta duidelijk polis tambe por actua”, señor Thomas Ruiz, experto den trafico, a splica, detayadamente.