Tayer pa educadornan riba autismo ta enfoca riba un futuro mas inclusivo

Minister Gerlien Croes

ORANJESTAD (AAN):  Diasabra mainta ultimo, a duna inicio na un tayer sumamente importante pa educadornan, cu tabata dedica na un tema esencial: autismo y su impacto riba educacion.

E tayer a reuni educadornan di diferente institucionnan cu un solo meta: fortalece nan conocemento y habilidadnan pa por crea un ambiente educacional mas inclusivo y di comprension pa nos mucha- y hobennan cu autismo. Durante e dia, varios presentacionnan tabata riba programa, incluyendo informacion crucial tocante importancia di comunicacion, autismo den movecion, y conocemento di accion, guiando educadornan pa duna un apoyo efectivo na scol.

Minister di Relacionnan den Reino, Educacion, Hubentud, Innovacion y Deporte, mr. Gerlien Croes, tabata presente pa inicia e tayer oficialmente, destacando compromiso di Gobierno di Aruba pa promove educacion inclusivo y sostenibel pa tur alumno y studiante.

Gradicimento na tur organisadornan, fundacionnan y educadornan cu a forma parti di e tayer aki, trahando hunto pa crea un futuro cu oportunidad igual pa cada mucha y hoben den nos comunidad.

Hunto, nos ta traha pa un Aruba mas inclusivo, comprensivo y fuerte.