Randolf Vrolijk di FEPA: - ORANJESTAD (AAN): Dialuna mainta, Fundacion Enseñanza pa Adulto (FEPA) tambe a reuni cu Formado y partner di coalicion nobo, pa splica riba e deseo cu nan tin pa Gobierno nobo tene cuenta cune.
Pa FEPA tabata presente Randolf Vrolijk y Jerehm Campbell.
Segun Randolf Vrolijk, te ainda por bisa cu Fundacion FEPA ta yuda Gobierno den maneha e exitoso programa di “Enseñanza pa Empleo”.
Enseñanza pa Empleo ta un ‘dienst’, y keto bay ta asina bao di Gobierno. Na cuminzamento e intencion di Ministro di Enseñanza tabata cu e ta bay resorta directamente bao di FEPA. Pero esnan di e Fundacion ta pensa cu como pais, bo no por privatiza enseñanza completamente. Pasobra Gobierno tin e deber moral y legal, di yuda e ciudadano cu no pro haya un caminda un curso of scol pa su yiu, y Gobierno tin e deber ey.
Nan ta reorganizando ainda, aunke medionan ta hopi limita. Nan ta spera cu Ministro nobo di Enseñanza por pone bay normal bek. FEPA ta spera di por caba cu esey den proximo lunanan.
Enseñanza pa Empleo a lanta 20 di April 1988 cu e meta di ‘Bij-, her-, en omscholing’. Pero awendia bo no por keda na ‘Bij-, her- en omscholing’ so, pasobra bo tin di bay traha Enseñanza pa Aruba. Unda e ciudadano ta haya chens di siña y sigui tur sorto di curso (‘longlife learning’).
TARIFA KEDA MESCOS:
Pero manteniendo e servicio basico cu bo tin como Gobierno. Pasobra Gobierno no por pas’e over na un fundacion, e ora nan ta bira doño y nan ta dicidi. Y awor den temporada di crisis, Gobierno mester garantiza e ciudadano cu nan tin acceso na enseñanza, formal y informal.
Vrolijk y Campbell di FEPA a splica Formado, cu nan ta trahando hunto den region caba (cu Curacao y Bonaire y Hulanda) ta tratando di trece mas curso pa Aruba, y hasta pa Enseñanza pa Empleo. Esey lo no costa Gobierno nada, pasobra FEPA ta trece y organiza nan.
Randolf Vrolijk a confirma cu e tarifa di Enseñanza pa Empleo no a subi. Tur curso keto bay eynan ta 250 Florin, cu excepcion di uno cu ta cobra 350 Florin.
Ciudadanonan cu no tin trabao y ta pasa via Sociale Zaken y CEDEHM, y nan por haya 2 curso gratis tambe. “Esey nos a introduci bek y e ta yudando hopi,” Randolf Vrolijk a indica.
FEPA kier bay concentra riba gruponan pa haya les, y awor na Augustus mes lo cuminza cu lesnan den Prison di KIA pa duna 6 te cu 8 curso. Tambe kier duna algun estudio na scolnan di MAVO tambe.
Vrolijk tabata contento di anuncia cu nan ta combersando cu dos Centro di Bario tambe, pa por cuminza duna les, y asina start cu lesnan den bario manera e tabata antes asina. Di e forma ey ta yuda pueblo, specialmente pasobra e situacion no ta facil. Pero FEPA kier pa e bira mas grandi den sentido cu e ciudadano ta haya mihor oportunidad cu e por desaroya su mes.
Vrolijk a splica cu Fundacion FEPA no a haya subsidio di Gobierno, ni 1 Florin. Normalmente Gobierno ta subsidia fundacion, pero aki ta e Fundacion ta subsidia Gobierno! Pero a bisa cu esey tin di bay bek na normalidad, unda Institutonan di Gobierno tin tur nan recurso cu nan mes por brinda e servicionan ey. Pero kizas lo bin un cambio na esey, y e ora ta FEPA lo bira e parti di duna conseho y guia na e.o. Enseñanza pa Empleo pa nan sigui amplia nan cursonan. Tin di corda cu e personal ta limita, y algun ta traha hasta bao di condicionnan inhumano. Pero dado momento nan so no por carg’e. Den e fase ey nan ta aworaki.
Sinembargo e tin e speranza cu Enseñanza pa Empleo lo por bin mas fuerte cu nunca.
