ORANJESTAD (AAN) – Siguiendo cu e ciclo di reunionnan cu stakeholders den cuadro di formacion di gobierno nobo, Formador Evelyn Wever-Croes y su team a ricibi e Fundacion Orguyo Aruba.
Tabata presente den e reunion, y tambe den conferencia di prensa, e Presidente di e Fundacion, Bruce Ponson hunto cu Egmar Irausquin y Lydianne Croes.
Bruce Ponson a hiba palabra den rueda di prensa y a splica cu nan a toca specificamente, e tema di LGBTQI Community na Aruba, y e derechonan cu nan ta exigiendo.
Ponson a menciona cu e combersacion a bay den un esfera masha agradable y ameno, unda tabata tin comprension di ambos banda.
“Nos a duna di conoce e parti di nos banda kico ta loke nos ta desea den e proximo gobernacion. Nos kier sigur, reconocimento y aceptacion legal pero ademas di esey e parti social, unda cu nan kier wak un comunidad mas receptivo di LGBTQI Community. Nos ta forma parti di e comunidad y como tal nos kier worde acepta legal y socialmente, pasobra nos tur ta paga mesun belasting, nos ta contribui mescos cu otronan den comunidad, y como tal, nos merece e derechonan igual”, Ponson a reitera.
Bruce Ponson a señala cu e oido tabata tey y nan a sinti nan mes scucha, y cu e puntonan a wordo tuma den consideracion, y nan ta spera di wak esaki bek refleha den e acuerdo di gobernacion, si nan yega na dje.
Bruce Ponson a splica kico ta Fundacion Orguyo Aruba, pa esnan cu no ta conoci cune.
E fundacion a wordo lanta na aña 2019, specificamente cu e meta pa legalmente reconoce igualdad e comunidad LGBTQI.
“Esey kiermen cu nos a hiba e gobierno e tempo ey Corte, exigiendo cu nan no ta cumpliendo cu derechonan humano estableci internacionalmente, y cu Aruba ta forma parti di Union Europeo, tratadonan internacional, y nos a gana e Caso; den prome instante tres diferente caso, y ainda nos no a ricibi igualdad y como tal nos ta bay Corte di Apelacion. Pero loke nos ta pidiendo specificamente ta, igualdad legal.
Es decir, cu nos lo kier pa parehanan di homosexual tin acceso na proteccion di nan relacionnan, nan bida, nan derechonan, nan bienes, etc. Pues, e reconocimento legal di homosexualnan dentro di nos comunidad” Bruce Ponson a declara.
E palabracion cu Formador ta cu nan ta bay incorpora e peticion aki den nan plannan di gobernacion, Ponson a agrega.
