Taoist Tai Chi Society Aruba  cu donacion na 5 instancia

ORANJESTAD (AAN):  Recientemente durante un brunch tur miembro di e Asociacion di Tai Chi Taoista na Aruba, a bin hunto pa comparti y hasi un donacion na 5 instancia caritativo.   

E representantenan di e 5 instancianan caritativo a cera conoci cu e miembronan di Asociacion di Tai Chi Taoista  na unda a splica e meta y obhetivonan practica desde 1999 na Aruba y e crecemento y experencia na Aruba den 22 aña.

            E ultimo 2 añanan tabata un reto pa motibo di e pandemia. Internacionalmente esaki tabata un impacto grandi pa nos miembrecia cu ta consisti pa 80% di miembronan 60 plus cu a cuida y mester a limita salidanan pa hopi luna te ora cu por a vacuna.

            Entre e pandemia su desaroyo y stabilidad tur nos miembronan por a keda practica Tai Chi na cas, beach, Plaza Betico Croes, Linear Park y unda cu nan tabata sinti safe cu otro. A tene nan mes na protocol di Covid 19 segun DVG tabata comunica pa asina disfruta di practica den grupo chikito of isola.

            Otro cambio grandi ta cu Asociacion di Tai Chi Taoista na Aruba mester a bende e Centro di Tai Chi cu a bira mucho grandi pa nan y alabes tabata un decision di nan Asociacion Internacional di Tai Chi Taoista mirando e prospecto economico mundialmente.

            E bon di e arte di Tai Chi ta cu bo por practica unda cu ta, ki ora cu ta y manera a cuminsa na 1999 por sigui atrobe. E ta practica den bida pa laga los y continua hunto cu e meta di practica Tai Chi pa cu e beneficionan di salud mental y fisico.

            Na mes momento a hasi uso di e cambionan cu Covid a trece cu ne pa termina e laso nan cu e Asociacion Internacional di Tai Chi Toaista. Cu e cambio aki  no por mantene e structura di e Asociacion di Tai Chi Taoista na Aruba.

            Bou di e nomber aki nan no por continua. Den e proceso aki di terminacion di e Asociacion e miembrecia completo a vota pa haci donacion di nan fondonan na 5 instancia caritativo cual den un reunion special a scoge: Hospice Atardi, Cas Marie, Fundacion Contra Violencia Relacional, St. Koningin Wilhelmina Fonds y St. Ban uni Man pa Cria nos muchanan.

            Prome cu a haci entrega di e donacion na valor di  Awg. 8.161,97 na cada instancia, tur miembro presente a haya un splicacion di e trabou cu ta haciendo y plannan pa futuro. Pero tambe con dificil tempo a bira pa haya fondo y bin cu mas sosten y proyectonan.

            Tur miembro a keda contento di por aporta y yuda e instancianan aki.

             E representantenan di e 5 instancianan caritativo a expresa nan gratitud y a desea nan hopi exito den futuro cu Tai Chi na Aruba den cualke forma cu nos scoge pa sigui,  pasobra den 22 aña a demostra seriedad, dedicacion  y profesionalismo.

            Tur practica semanal lo sigui manera custumber cu nos grupo di personanan cu ta practica of a yega di practica tai chi. Tur ta bon bini pa join.

Adhunto por wak ariba e prome potret (robez pa drechi):

Lillian Prince, Presidente di St. Koningin Wilhelmina Fonds;

Lisette Does, Presidente di Cas Marie;

John Fun, Presidente di St. Ban uni Man pa Cria nos Muchanan;

Benita Britt-Croes, Presidente di Hospice Atardi;

Audrey Croes, Presidente di Fundacion Contra Violencia Relacional.

            E di 2 potret ta e grupo completo (tur miembro di e Asociacion di Tai Chi Taoista na Aruba y e 5 representantenan di e instancianan caritativo ariba menciona, cu a haya un donacion special).