Ta trahando riba un solucion duradero pa problema di RWZI

Minister Ursell Arends:  ---*Pa por sigui opera e RWZI-nan, ta bay rekeri un inversion cuantioso

ORANJESTAD (AAN): Durante un conferencia di prensa Dialuna, minister di Naturaleza Ursell Arends a papia riba e asina yama RWZI, cu ta Rioolwaterzuiveringsinstallatie (planta di purificacion di awa).

“Hopi biaha nos ta para y puntra kico ta RWZI y con e ta funciona riba nos isla”.

Ya caba na 2018 e tema aki a wordo treci dilanti como un tema di urgencia y prioridad, pa con nos ta move padilanti cu nos isla.

Aworaki ta e momento pa nos para keto y reconoce e urgencia y prioridad cu tin pa atende cu RWZI, segun Arends.

El a splica cu profesionalnan di D.O.W cu tiki recurso financiero a logra mantene e RWZI-nan operacional.

“Sinembargo comunidad mester realiza cu pa nos por sigui opera e RWZI-nan, ta bay rekeri un inversion cuantioso”, segun e mandatario.

El a sigui bisa cu ta bon pa realiza cu e condicion cu e RWZI-nan ta encontra nan mes aden, specialmente esun na Bubali, ta pone e unico pilar economico na peliger, como tambe salud di henter comunidad.

Banda di esaki Arends a indica cu esaki ta causa daño na naturaleza.

Pesey e minister a presenta na e conferencia di prensa cu dos profesional pa duna un presentacion riba e problema, mientras cu ta trahando riba un solucion duradero pa atende cu esaki.