Ta sigui inverti den Brandweer Aruba den ekipo nobo y training di personal

Minister di Husticia Arthur Dowers:

*Un otro grupo a pasa curso di operacion di Ladderwagen cu exito

ORANJESTAD (AAN) – “Tur departamento den Ministerio di Husticia na Aruba ta enfrentando diferente reto,” asina Minister di Husticia, Arthur Dowers, a declara recientemente. Segun e minister, actualmente ta trahando activamente pa aborda e desafionan aki y implementa solucionnan sostenibel pa fortalece e funcionamento di cada departamento.

Un di e departamentonan cu ta enfrentando e retonan serio ta Brandweer Aruba. Entre e principal desafionan ta e escasez di personal, loke ta haci cu ta necesario recluta mas personal na corto plaso y ofrece nan e preparacion adecua pa nan por desempeña nan funcion di un manera profesional y eficiente.

Ademas di e falta di personal, Brandweer Aruba tambe ta confrontando limitacionnan den material. Segun Minister Dowers, ya a cuminsa cu e proceso di adkiri material nobo pa fortalece e capacidad operativo di cuerpo di bombero. El a enfatisa cu, hunto cu e inversion den ekipo moderno, ta esencial capacita e personal pa opera y mantene e aparatonan nobo di forma corecto.

“Falta di conocemento tocante e operacion y mantencion di ekiponan moderno por resulta den gasto innecesario. Recursonan ta limita, p'esey nos mester inverti tanto den cuida loke nos tin como den entrenamento continuo di nos personal,” e minister a señala.

Dowers a informa cu varios funcionario di Brandweer Aruba ya a participa den diferente entrenamento tecnico. Como parti di e esfuersonan aki, dialuna mainta a entrega certificado di e curso di operacion di Ladderwagen na e trahadonan cu a completa e capacitacion exitosamente.

Relaciona cu innovacion tecnologico, e minister a indica cu Brandweer Aruba ta sigui e desaroyonan den e sector y regularmente ta renoba su ekiponan conforme e necesidadnan operacional. E inversion den tecnologia ta bay acompaña cu entrenamento y educacion continuo, pa garantisa cu e personal por uza y mantene e material nobo di manera eficiente. Segun Dowers, tecnologia moderno no solamente ta aumenta e capacidad operativo di Brandweer Aruba, sino tambe ta permiti un uzo mas efectivo di e recurso humano disponibel.