Errol de Freitas, Presidente di SNBA:
*Recientemente compania Amston a bin Aruba y a reuni diferente biaha cu CAP
ORANJESTAD (AAN)—Presidente di SNBA (San Nicolas Business Association, Errol de Freitas, den entrevista cu DIARIO a señala cu ta secreto publico cu tin yen di mineral den e subsuelo di Aruba. Ya varios compania a bin Aruba bao e gobierno di mesun signature cu ta na mando awo, bao di e Minister di Energia e temponan ey, y nan a bora na diferente lugar.
Errol de Freitas a splica cu, recientemente, compania Amston a bin Aruba y tabata tin diferente reunion cu CAP, y nan sa cu den e part Zuid-West di Aruba tin un pos cu ta mustrando cu tin di 93% pa 95%, sigur, di gas.
“Nan ta papiando di 1.4 trillion pia cubico di gas. Esaki ta nifica 20 aña di gas pa nos, na Aruba. Mi nunca tabata sa cu di e gas aki bo por genera productonan manera gasoline, kerosene, diesel, anto e ta yama nos atencion. Esaki ta e situacion”, Errol de Freitas a remarca.
“Papiando cu e informadornan e temponan aya, nos a trece dilanti, Actualmente, mi ke sa kizas e apetit no ta hopi, pero kico nos ta bay haci si nos sa cu esaki ta existi? Nos no por, gewoon, bari esaki for di mesa. Anto kico esey lo bin? Nos ta papiando cu un grupo cu ta den evaluacion cu algun experto di e refineria cu nos tin, anto si nan tin e capacidad y nos por haci un matrimonio entre nan cu Amston, nos tin un producto eynan. Cu nan bay tin mester di henter e refineria? NO! E refineria tin full un seccion cu bo ta uza pa ‘proper development’, kiermen si bo drenta e refineria, di locual nos ta yama ‘e main gate’ di nan, na final di caya, casi tur aspecto di banda robes bayendo den Colony, lo por ta ‘open development’. Bo tin luga pa casnan, kiermen bo tin yen di posibilidadnan, solo panel, wind panel, tin tur sorto di cos cu bo por haci”, Errol de Freitas, Presidente di SNBA a señala.
