Ta purba yega na e hobennan via scol cu campañanan actual “No cay den trampa”

Jeanette Richardson-Bars, hefe CMMA: 

*Esun “Habri bo wowo” ta den curriculum escolar y tin bon resultado 

ORANJESTAD (AAN) – Señora Jeanette Richardson-Bars, Hefe di Departamento di Traficacion di Hende (CMMA), den entrevista cu DIARIO a bisa cu tin biaha ta dificil pa bisa di biaha kico un caso ta: Menselhandel of Menselmokkel, pasobra por ta un of otro of tur dos.

Richardson a bisa cu hende mester ta cauteloso pa cosnan asina, y ora personanan ta yama na e departamento nan ta bisa cu ta sona cu tin indicadornan di traficacion di hende, pero e por ta cu ta full otro caso tambe.

“E grupo di hobennan cu ta mas vulnerable aworaki ta den edad di 12 pa 18 aña, pasobra esey ta e edadnan cu mayornan ta duna nan e telefon, I-Pad, e Laptop, etc. Nan ta bay internet riba nan mes. Tin muchanan mas jong pero nan mayornan ta bay riba nan mas ainda, y nan no tin oranan largo riba social media. Pero for di 12 aña nan ta manera riba nan mesun mundo, nan no tin amigonan di berdad mas, nan tin amigonan online, y esey ta hopi riesgo pa nos”, señora Richardson a señala.

Jeanette Richardson a referi na nan campaña “No cay den trampa” cu a cuminza na scolnan, eigenlijk cu e idea cu full e asunto di “Habri bo wowo pa traficacion di hende”, cu ta activo pa un par di aña caba, keda introduci na scolnan como parti di nan curriculum.

“Pero e no ta facil pasobra cada scol ta dicidi pa nan mes, si nan kier uz'e, si of no. Nos tin scol cu a hacie caba y tin bon resultado di esey, pasobra basa riba nos investigacion tin riesgo pa explotacion na scol, e por ta riba actividadnan criminal, manera den e medio di droga pero tambe den prostitucion di menor di edad, cu nan ta wordo forza door di famia, of amigonan pa nan prostitui nan mes”, señora Richardson a señala.

CMMA a purba di yega na e hobennan via scol, e campaña ta online, y e parti cu ta dirigi na e mayornan tambe ta informa nan cu, eigenlijk, nan tin responsabilidad di controla kico nan yiunan ta haciendo. “Y, esey ta falta hopi den e dianan aki, pasobra bo ta wak ora un famia ta bay come na un caminda, bo ta wak cu e muchanan ta riba nan telefon so, no tin combersacion mas. Y, esey ta algo cu mester bin bek, pa hendenan compronde cu un telefon, social media, no por tuma e lugar di un mayor cu ta papia cu nan yiunan, pa dirigi nan riba e caminda bon”, señora Richardson a remarca.

E ta spera cu lo bin mas cooperacion y cu ora tin sospecho por meld na CMMA, pa nan por haci investigacion, por ehemplo acerca polis.