Minister Ursell Arends, titular di Transporte Publico:
*Nan a faya e trahadornan y nan a faya gobierno
ORANJESTAD (AAN) – Minister Ursel Arends, como titular di Transporte Publico, a dirigi palabra den presencia di Sindicato SEPPA y prensa, na e trahadornan di Arubus, den e contexto di nan demanda pa ahuste di salario.
Minister Arends a expresa lo siguiente: “Mi ta lamenta cu awe boso mester ta dilanti cas di gobernacion pa manifesta boso disgusto; pero loke si mi por bisa boso como gobernante, y di parti di gobierno, cu mi tambe ta disgusta!
Pakico mi ta bisa esaki? Pasobra ta politica di gobernantenan a conduci pa Arubus ta unda e ta awe. Un compania practicamente bancarota, y no ta Ursell Arends ta bisa esaki ta Algemene Rekenkamer ta bisa esaki, CAft ta bisa esaki, y e PWC Doorlichting cu a wordo conduci pa loke ta trata Landspakket tambe ta confirma cu Arubus ta un compania bancarota. Loke nos ta para aworaki ta un momento crucial. Di con? Sea nos ta bay den direccion di cumpli cu exigencianan cu kizas no ta factible na e momentonan aki, of nos ta bay traha hunto entre gobierno cu e trahadornan p’asina aki, pone e compania para bek riba su pia.
Como minister mi a para semper banda di e trahadornan pa duna boso mi sosten, p’asina aki nos por rescata e compania, y mi ta cla pa haci un intento atrobe. Loke si ta evidente ta cu Gerencia ta incapaz. Esey ta keda mas cu evidente, pasobra nan a faya boso como trahado pero nan a faya gobierno di Aruba tambe y mi ta representa e unico accionista”, Minister Ursell Arends a vocifera.
