Ta bay brinda oportunidad despues di 15 aña di opleiding pa Bevelvoerder pa Cuerpo di Bombero

Minister Rocco Tjon:

ORANJESTAD (AAN):  Recientemente, a inicia e opleiding di bevelvoerder pa Cuerpo di Bombero di Aruba, na brandweer post Tango. Den cuadro di maneho di ministerio di Husticia y Asuntonan Social, ta inverti den profesionalisacion di personal.

            Manera ta conoci un parti cardinal di e maneho cu ta wordo hiba for di Ministerio di Husticia y Asuntonan Social, ta inversion den personal. Asina por bisa cu despues di hopi tempo cu opleidingen pa cu brandweer tabata pega, a percura pa opleiding di werkplekbegeleider. Banda di esaki, a certifica ocho bombero como instructor, esaki despues cu nan a termina nan opleiding na Curaçao exitosamente.

            Ademas di esaki, e opleiding di manschap B ta den su segunda fase aworaki. Y pronto e opleiding nobo pa adspiranten lo inicia. Siman pasa tawata un momento importante, mirando cu despues di 15 aña, ta brinda oportunidad pa personal di brandweer por sigui opleiding pa bevelvoerder. E ultimo biaha cu a brinda e opleiding aki, tawata na aña 2007. Esaki lo percura pa eleva e nivel di brandweer, pero tambe ta sumamente importante pa e carera di e bomberonan.

            Por ultimo, por conclui cu esaki ta un di e hopi proyectonan positivo cu tin andando pa Cuerpo di Bombero. Asina por bisa cu a cumpra cuater truck nobo, completando e fleta di e trucknan, e bluspakken a yega Aruba recientemente, cual ta inclui “ademluchtapparatuur” nobo pa cada Bombero. Ademas di esaki, a ricibi tambe uniform nobo, laarzen, handschoen y helmnan.

            Manera ta conoci, banda di e aspecto di material, e posicion huridico di e trahadonan ta hopi importante tambe, pues manera a menciona anteriormente e bevordering di cada trahado ta na Gobernador pa wordo firma, y ta  den su fase final. Tambe ta conoci cu Brandweer Post di San Nicolas; “Sierra”, ta den pleno renobacion y ta premira cu pa fin di aña esaki lo mester ta cla.