Sulay Correa a haci denuncia publico contra DIMAS y Warda Nos Costa

Prome cu el a entrega su mes na WNC:

ORANJESTAD (AAN) – Sulay Correa ta un persona cu tin 22 aña bibando na Aruba, y cuater dia pasa el a entrega su mes na Warda Nos Costa, pa e wordo deporta pero e ta haya inhusto cu e tin cu abandona Aruba unda e ta declara negligencia di ambos instancia gubernamental.

            “Personanan cu ta conoce mi sa ken mi ta, y cu mi ta un bon ciudadano na Aruba. Awe mi ta entrega na WNC pa dos motibo. E prome pasobra mi no tabata sa cu e concubinato den cual mi tabata no ta valido pa ley, pero un huez a duna mi e libertad di WNC, pasobra mi tabata cera pa motibonan personal, motibo di pareha, y e huez a ripara mi situacion y cu mi no mester a keda cera pa Warda Nos Costa pasobra nan no a gara mi trahando ni den ningun problema. Simplemente, nan a pasa mi di Polis pa WNC.  Mi a gana e Caso na e momento ey unda cu e Huez a permiti mi warda mi permiso na Aruba, door di e añanan cu mi tin na Aruba cu ta 22 den total pero 13 cu ta conta for di momento cu mi a bolbe drenta Aruba.

            WNC a haci mi bida imposible, specialmente señor Melvin Ras, pasobra e no a scucha loke mi mester a mustra. P’esey Huez a pidi’e pa mustra e concubinato cu ta valido door di Notario y p’esey nan a haya nan mes forza na laga mi liber. Pero despues di esey mi mester a cana un caminda di calvario na unda mi a paga mi permiso, unda mi tin mi garante, y na unda otro huez a posterga un huicio nobo pa mi por tin e manera di demostra cu mi tin un garante valido pero DIMAS no a move mi papelnan. Mi ta pidiendo mi BTA, cual na cuminzamento nan tabata bisa mi cu tur cos ta bayendo bon, cu nan a aproba e cas, e garante y tur cos.

            Pero diripiente algo a bay robes y nan a bisa cu nan ta nenga mi e permiso pasobra e garante no ta gana suficiente. Tur basa riba chisme y suposicion, pasobra e garante si ta cumpli cu tur e rekisitonan stipula pa DIMAS. DIMAS a bin un dia prome cu Huez Martijn a dicta cu mi mester abandona Aruba, pasobra el a posterga dos biaha mi audiencia pa duna chens pa nan duna mi e permiso. Pero como e no a mira movecion cu DIMAS obviamente e mester a cumpli cu su deber”, Sulay a declara.

            El a bay firma na WNC pa nan no pon’e preso no obstante nan sa cu e tin un permiso, cu e ta wardando su BTA, a sabiendas cu nan sa cu nan ta haciendo cosnan cu no ta corecto, por ehemplo bisa cu el a casa cu un choller y cu el a paga pa un casamento ficticio locual e ta enfatiza cu no ta falso. Su ex-pareha tin titulo, e ta traha, nan matrimonio a consuma, y manera tur ser humano tin problema.

            El a comenta cu un persona di DIMAS mes a haya su papelnan den un hoeki cla pa bent’e den bari di sushi, y e ta sospecha cu tur esaki a wordo haci na proposito pasobra e persona cu ta nenga su permiso tabata pareha di su ex-concubino. E kier trece su experiencia dilanti pa ningun hende na Aruba pasa den algo asina cu DIMAS y of WNC.