ORANJESTAD (AAN) – Na Universidad di Aruba, studiantenan di 4to aña di Trabao Social a organiza un exhibicion riba e tema “Stop tur sorto di abuso” y nan ta transmiti e dolor cu abuso ta causa, atravez di arte.
Esaki den e contexto di e 16 dianan di “Orange the World”, cu ta dianan di activismo contra abuso riba hende muher adulto y mucha, pero U.A door cu ta inclusivo, a enfoca tambe riba hende homber. Manera ta conoci e dianan pa bisti mundo di oranje a cuminza dia 24 di November y lo caba dia 10 di December.
Suki-Ann (Suki) Croes y Keano Maduro, studiantenan di Trabao Social na U.A, a elabora al respecto. Keano aduro a papia tocante e obra cu nan a presenta na Universidad di Aruba, cu a consisti di expresa abuso pa medio di pintamento of drama.
Esaki ta un oportunidad pa profundiza den e tema, pasobra e ta uno cu no ta worde papia hopi, dia pa dia, den nos comunidad, y e evento aki tabata pa crea concientizacion riba e tema di abuso.
Sukie a tuma palabra y a bisa cu e nomber di e presentacion ta “stop the beating”. E script ta traha door di meneer Thompson, ken a lidera e presentacion.
E hoben a splica cu e tema di abuso no solamente ta hopi tabu ainda, sino cu e ta bay hopi profundo tambe y tur forma cu esaki por sosode, y esaki ta abuso fisico, sexual, emocional, negligencia den caso di yiunan cu semper ta nan so, cu no tin hende pa percura pa cuida nan, ni mustre stimacion. Esaki ta un sorto di abuso riba cual comunidad mester reflexiona y pone enfasis riba dje tambe.
Pero e 16 dianan aki ta pa pone atencion riba tur sorto di abuso desde acoso te abuso fisico, emocional, psicologico, negligencia, etc.
Como trahador social na nivel di mentor, nan mester reconoce ora tin abuso, si no por haci esaki e ta bira peligroso, segun e dama. Mester sa di dje, orienta den dje.
El a agrega cu den e cultura di nos comunidad nos ta hopi keto. Algo ta pasa cerca un bisiña y nos no ta bati alarma. Pues, algo hopi importante ta pa ta atento y ta importante pa bisa ora algo ta pasando cu no ta bon; y tin cu sa unda pa meld esaki tambe.
Pues, e hende su responsabilidad ta pa e sa si e ta den e cuadro di abuso.
Keano a agrega na esaki, cu importante ta pa comunidad papia door over di e tema, pa e hobennan por durf di papia di esaki cu hende cu nan ta confia, entre nan mes. Esaki ta e prome paso pa por cuminza haci cambio. Esaki ta crea concientizacion cerca e hobennan cu, sea den famia, den nan circulo di amigo, na scol of na trabao algo ta pasando cu no mester tolera.
