ORANJESTAD (AAN); Diabierna mainta, alumnonan di Colegio Arubano den Vondellaan a walk-out pa demostra nan malcontento
pa loke nan ta considera reglanan absurdo cu tin di haber cu loke nan mag di bisti of no ora di bay scol y ora di haya lesnan di gimnasia.
Cada aña nan ta notando cu e reglanan ta cambiando, y awor pa colmo ta parce cu pa 2021-2022, e reglanan a bira demasiado extremo y radical.
Alumnonan en general ta acepta reglanan pa asina e scol funciona cu ordo y cu e patronchi corecto di conducta. Pero e reglanan pa cu bistimento nan ta haya di ta sin pia ni cabez, y reglanan nonsense.
Riba Diabierna mes, nan a entrega un Carta na Rectorado, firma pa casi 900 alumno di e scol di HAVO y VWO, pa duna nan punto di bista.
Den e carta nan a splica cu como cu Facebook no por ta un medio oficial di contacto pa Colegio Arubano (debi cu tin hopi mayor cu no tin social media), ta apenas na Augustus nan a wordo informa di reglanan nobo pa e aña escolar di 2021-2022, incluyendo varios regla cambia y tambe nobo.
Reglamentonan nobo ta inclui cu nan como studiante y tambe como mayornan no ta di aucerdo. Entre otro: (1) Solamente hoodie cu logo di Colegi ta acepta riba tereno di scol. (2) Solamente shortnan special di Gym ta permiti na lesnan aki. (3) No mag di bin cu leggings, jeans cu e rand abao fraya, y tampoco jeans cu patch riba nan.
E argumentonan di alumnonan contra esaki ta como lo siguiente:
(1) Hoodie cu Colegio Logo so riba dje ta un reglamento nobo. Esaki nifica cu nan tin di bay cumpra Hoodie adicional cu logo. Corda cu Hoodie no ta barata y e ta bay bira costo adicional cu no tur mayor por afford. Un sugerencia di lidernan escolar ta pa pone e logo di Colegio riba bo mesun hoodie. Esey nifica cu den bo tempo liber bo ta cana cu e logo di Colegio tambe, pues ta corta mas e espacio di nan identidad di adolescente excepto na scol.
(2) Muchanan kier sinti nan mes safe durante les di Gym den e sentido cu nada ta wordo ‘exponi’. Nan ta asumi cu e seguridad aki ta importante tambe pa cabezantenan di scol. Pero nan ta mustar cu e shortnan di gym cu Colegio ta exigi, NO ta suministra e seguridad aki durante lesnan di Gym. E alumnonan na parti priva ta bira demasiado visible. Pesye mes varios mucha muher ta escoge pa bisti leggings of nan mesun short adecuado di Gym (te na rudia), y mucha hombernan tambe ta escogiendo nan mesun short adecuad di Gym (te na rudia).
(3) Nan ponencia relaciona cu e rand fraya di jeans of esnan cu patch riba dje, ta cu e regla aki no tin funcion y pesey no tin ningun sosten/backup di un aspecto di seguridad. Colegio ta bisa cu nan tin e regla aki pa asina siña e alumnonan pa funciona mas optimal den nan estudionan avanza y despues como profesional. Pero hecho ta cu na Universidad y Hoge Schoolnan na Hulanda, unda top profesionalnan ta haya educacion, no tin ningun regla pa bistimento.
Den e carta nan a keha tambe cu cada rato cabezantenan di scol ta cambia regla di bistimento. For di comienzo di 2019 caba ta haciendo esaki. Y tin biaha e ta hasta socede mey-mey di aña escolar. Por corda con na 2020, diripiente a pone cu leggings tambe ta prohibi. Tambe tin studiante cu a wordo para na entrada ora cu nan a yega scol cu sweatpants y short di landamento, siendo cu esaki no ta poni mes den reglamentonan. Esaki ta mustra cu Rectorado no ta consistente den nan reglanan.
Pero final ta e mayornan tin di bay gasta placa riba paña nobo cada rato, siendo cu e pandemia a pone cu situacion financiero di hopi hende a bira dificil. Tambe ta reclama e tipo di chantahe cu e alumno tin di firma e formulario di aceptacion aki, sino e no por haya les.
Studiantenan ta sinti cu e actitud y medidanan di Rectorado ta uno hopi dominante, uno cu no ta tolera participacion, unda opinion of punto di bista di studiantenan no ta importante, unda nan ta prefera di impone medida envez di duna un splicacion. Ta parce cu no tin espacio pa hubentud mas, y no ta tene cuenta mas cu e etapa di desaroyo socio-emocional di e hobennan. Y nan ta hayando les estilo di accionnan autoritario y di sancion, envez di duna reconocemento of confia den bo capacidad di rasonamento. Pues nan mester di un clima di scol unda nan por actua como personanan hoben.
Pero awor, nan no ta sinti nan mes como hoben mas, y mas bien ta cu Colegio ta actua cu ora bo ta un hende hoben.. esey ta un crimen.
