STA a logra un hopi bon CAO pa empleadonan di Tierra del Sol

Diego de Cuba hopi satisfecho:

ORANJESTAD (AAN) – Delegadonan di Tierra del Sol tabata presente Diaranzon, na momento cu Sindicato STA y e Compania a firma e Contrato Colectivo pa su empleadonan.

Den entrevista cu e lider di STA, Diego de Cuba, el a menciona pa DIARIO, cu e proceso aki a dura largo, pasobra na momento cu nan tabata bezig caba negociando, a surgi e pandemia na 2020, y esey a trece un retraso cune y locual ta haci STA contento ta cu e negociacion a bay hopi bon.

E empleadonan a hala faha mara durante e pandemia, y Tierra del Sol no ta un compania cu tabata tin e forza financiero-economico pa solvent e exigencianan cu e Sindicato a bin cune den e CAO.

De Cuba a splica cu loke a pasa ta cu despues di e pandemia a mira un recuperacion, y ora STA tabata cla pa firma un contrato colectivo binti aña pasa, a bin compronde cu e compania a wordo bendi cu un grupo Spaño.

“Y, manera mi a bisa anteriormente ‘no hay mal que por bien no venga’ y e CAO cu STA a firma Diaranzon pa e empleadonan ta uno bon balansa, cu tin e mayoria di ingredientenan pa un bon contrato colectivo”, Diego de Cuba a señala.

Diego de Cuba a indica cu e CAO aki ta pa tres aña, y loke STA a logra cu e contrato aki ta basta bon, y haci un calculacion di tur cos hunto, e trahadornan lo bay dilanti e siguiente tres añanan cu mas of menos 15%, cual ta un average di mas of menos 5% pa aña, y tur locual nan ta bay dilanti cune ta na salario, den dianan liber cu pago, den nan sistema di spaar, e bonus di fin di aña y nan placa di vacacion.

“Si nos wak tur cos hunto, e ta un contrato colectivo basta bon toch. Nos sa cu como sindicato nos por a presiona un tiki mas, pero mirando e hecho cu e compania cu ta bay tuma over aworaki tin cu bay haci un inversion bastante formal, pa locual ta e infrastructura pa e campo di golf, cu a deteriora den e añanan cu a pasa y pa falta di ekipo pa e trahadornan tabata dificil pone atencion ya cu e situacion no tabata mucho di gaba, y el a bay bastante atras”, De Cuba a relata.

STA a splica e doñonan  nobo cu nan tin comprension pa esey, pero di otro banda nan tambe mester mustra comprension pa e empleadonan cu a warda asina hopi, cu a sacrifica y a mantene toch cu e tiki cu nan tabata tin.

“Mi tin cu bisa cu nan a mustra comprension y danki Dios nos a firma cu e doñonan nobo y nos ta spera cu paz laboral por reina den Tierra del Sol e proximo añanan y cu despues di esaki nos lo por firma algo mucho miho pa e trahadornan”, Diego de Cuba a señala, y a conclui bisando cu e inversionistanan aki no ta hende miyonario sino biyonario y hopi serio, y nan kier haci inversion na Aruba. STA a desea nan hopi exito y cu tur cos bay bon.