Speedworld cu boso amigo Hubert ‘Furai’ Tiel.

SPEEDWORLD

  Mundo di e Deporte di Drag Racing na Aruba y Curaçao, ta prepara pa riba mañan (Diabierna) nan bisa Freddy Ruiz un “Ayo, te despues champ”.

  Haciendo un storia largo, cortico, nos por menciona cu Freddy Ruiz, ya den su tempo como e grandinan di Casino, a sa di ta semper na top cu su autonan cu ta core cu bon velocidad. Tempo cu Drag a cuminza na hermana isla di Curaçao, Freddy ya tabata sa di planta respet cu su Chevrolet Corvette. Akinan ta caminda cu por a wak cu e deporte di Drag, pronto lo tin un cambio, debi cu Freddy, conhuntamente cu su ruman Maikito y su bon amigonan di Casino, semper tabata busca piesanan pa ta asina mas competitivo contra e contrincantenan di Curaçao y Venezuela.

   Prome cu esey Freddy tabata forma parti di Leo's Racing y semper cu un dedicacion pa semper tin e motornan mas potente. Na momento cu Freddy a ripara cu su contricantenan tabata yegando cerca, e mes conhuntamente cu Henry Christina y algun amigo mas, a dicidi, cu ta ora pa bin cu un cambio drastico den Drag y asina a bay Merca y cumpra in Camaro Pro-Stock, cu a haya e nomber di “Bad Banana”.

   Bad Banana tabata un auto cu sigur tabata e topico di tur combersacion y cu a pone e otro teamnan, bay cas y haci un bon huiswerk, pa por bin bek, tambe cu autonan potente.

  Historia a wordo skirbi y pa esnan cu tabatin e honor e tempo ey di por a bay Curaçao pa sea competi y wak careda, a biba e momento cu no por a wak e team yega pista cu e auto Bad Banana, acompaña pa King Kong di Beetle Nadal y Antillean Casino di Maikito Ruiz.

   Diabierna lo ta entiero di Freddy y mundo di Drag y Speedworld, ta bisa Freddy Ruiz, te despues ruman, bo leyenda lo keda den nos recuerdonan.