SMAC cu Raad van Toezicht y Stichting Musica a firma pa oficialmente organiza Carnaval 72

Presidente di SMAC, Darren van Ommeren:

ORANJESTAD (AAN) Darren van Ommeren a declara cu SMAC ta cla pa Carnaval 72. SMAC, den compania di Raad van Toezicht y Stichting Musica a firma firma e Decreto Ministerial (MB), cual ta duna nan oficialmente, e derecho pa organiza Carnaval 72.

   Van Ommeren a expresa, den entrevista cu Matutino DIARIO, cu danki Dios nan a traha durante henter e aña aki, cu por bisa cu e trabaonan ta djis continua, y por ranca sali dia 11 di November awo.

“E permisonan mas tanto, den e caso aki, aunke e ta un fiesta nacional, bo ta keda cu e dianan cu bo tin cu cumpli cu ne, cu e departamentonan, y e rekisitonan tambe.

   Pa sponsoring tambe, den e caso aki, e MB ta hopi necesario mirando cu cada un patrocinador ta pidi esaki como rekisito, anto den nan rekisito nan ta pone permiso. Pero un bez, den nos caso, e MB ta nos permiso”, Van Ommeren a indica.

El a agrega cu pa nan por yega pa e patrocinador por dicidi cu e ta sponsor, den e caso aki SMAC, nan mester tin esaki den nan man pa nan por pa pone como rekisito pa haya sponsor.

“Ayera nos a haya oportunidad pa nos expresa nos puntonan, den e caso aki Minister di Finanzas, señor Geoffrey Wever, y tambe Minister Presidente y alavez Minister di Cultura, señor Mike Eman, tabata habri pa scucha esaki.

Nan mes momento nan a bisa pa nos pone un Comision pa nos por set e liñanan aki stret. Cosnan cu mi ta kere cu ta necesario, fuera di e MB, mi ta kere riba un termino largo, partnership, den e caso aki ban yam’e asina, pa cu e MB lo ta necesario, asina ey bo ta sigura continuidad di bo trabaonan”, van Ommeren a señala.

El a agrega cu tambe e ta kere cu ta necesario, mirando cu no ta un secreto cu Carnaval di Mucha ta un di e carnavalnan cu ta bayendo atras, pa wak con nos por inculca esaki sea den scol, etc.

“Con nos por rebiba esaki di un forma of otro. Sea den un forma di finanzas of den un forma di educacion, esey tambe nos a bisa y mi ta kere cu nan tabata habri pa scucha tur esaki y Minister di Cultura a bisa ‘laga nos pone un comision’ unda tanto di nos banda, Stichting Musica, Gruponan Uni, e Comision mester wordo forma, hunto cu Gobierno. Anto pa hunto, nos trece e puntonan riba mesa, y zorg pa esakinan wordo drecha pa den futuro e por wordo canaliza trankil”, Presidente di SMAC Darren van Ommeren a señala.