ORANJESTAD (AAN) — Director di Stichting Scolnan Catolico Aruba (SKOA), Anuesca Baly, a yama un conferencia di prensa, den cual el a cuminza pa splica cu
Diahuebs 2 di September e scolnan catolico a habri, claramente cumpliendo cu e reglanan di higiene cu ta necesario pa por funciona den nan scolnan.
Banda di esaki Diaranzon atardi SKOA a delibera cu algun persona; un di nan ta Mediador Anselmo Pontilius cu for di Januari, den e Comision hunto cu SEPPA, y tambe cu un representante di Minister di Labor, ta bezig buscando un solucion.
Manera ta conoci nan a entrega un propuesta tocante kico por haci pa resolve e problema, of e impasse di e trahadornan di limpieza di SKOA.
“Dus, aworaki nos ta deliberando ainda, e ta hopi bon, e dialogo ta habri y no solamente Mediador ta cu nos pero tambe tin parlamentarionan cu ta bezig riba nan front ta haci cierto preguntanan, pa wak con nos por bin cu solucion mas lihe posible, pa asina pa por lo pronto nos scolnan keda habri”, Anuesca Baly a señala. El a agrega cu esaki tambe ta e meta di SKOA pa e muchanan.
“Pasobra e muchanan, manera mi a menciona. Diahuebs mainta mi a pasa na diferente scol, y e muchanan ta contento di ta na scol, juffrouwnan sigur ta hopi feliz, pasobra despues di hopi siman di no wak nan alumnonan, awo ta contento di wak nan bek, y esey pa nos tambe ta di sumo importancia”, director di SKOA a expresa.
Anuesca Bali a agrega cu pa SKOA no solamente ta importante e salud mental di e muchanan, pero nan salud tambe den sentido cu ora nan ta na scol, e ambiente ta higienico. “Y esey tambe nos a resolve caminda cu nos por. Tin caminda cu no tabata tin werkster anto caminda cu tabata tin dos, nos a manda un bay traha na otro scol tanten, pasobra e budget ta limita, pues e ta dificil. Pasobra ora cu normalmente, ora cu tin un scol grandi cu tin dos of tres werkster aworaki tin uno of dos ta trahando, envez di normal cu ta tres. Pero ya, nos ta purba di lora cu esaki te ora cu bin un solucion”, director di SKOA, Anuesca Baly a reitera.
El a agrega cu SKOA a wordo asegura cu un solucion ta bay bin manera cu Gobierno forma, y e minister nobo di enseñanza sinta cu SKOA na mesa, locual ta duna nan un espacio pa tuma decisionnan concreto y wak con nan ta sigui maneha e lucha akinan pa nan trahadornan di limpieza, cu pa SKOA ta hopi importante.
