Situacion den diferente cas di famia na Aruba ta alarmante

Gabriel Marchena kende ta Trahado Social di FPNC:

ORANJESTAD (AAN) – E trahado social di Fundacion pa Nos Comunidad (FPNC), Gabriel Marchena, den entrevista cu DIARIO a señala, cu e situacion den diferente cas di famia na Aruba ta alarmante. E no kiermen riba e aspecto financiero so, pero pa diferente factor cu ta crea problemanan social cu no tur mayor por maneha y tambe mester di guia.

El a declara cu e ta kere tambe, cu esaki tin di haber cu e educacion basico cu e muchanan ta ricibi na cas, y despues di esaki scol ta enfoca riba e parti di formacion y desaroyo di esaki.

Pero en combinacion cu esaki FPNC ta nota cu na cas tin falta di guia pa mucha, pero tambe mester wak den ki forma instancianan por yuda e mayor. E ta kere cu tin falta di informacion of sosten.

FPNC tin contacto cu diferente instancia y clientenan por tuma contacto cu e fundacion y nan ta guia nan riba e caminda di ayudo.

Señor Marchena a haci un yamada na Comunidad di Aruba, como Fundacion Pa Nos Comunidad, pa den su totalidad ban yuda, ban comparti, manera e proyecto ta bisa: “Ban comparti felicidad den cada familia cu tin necesidad. “Ban haci’e di un forma cu nos ta duna compasion na otro ser humano, na nos prohimo, habri nos curazon y yuda un tiki. Cualkier suma of regalo cu bo kier yuda cu ne, donacion di comestible ya yuda, pasobra na final nos tur como comunidad, eigenlijk, por yuda e famianan si nos ta duna nos aporte na e proyecto aki”, Gabriel Marchena a manifesta.