Sindicatonan a tene un protesta silencioso

ORANJESTAD (AAN):  Den oranan di atardi, sindicatonan a dicidi di expresa nan mal contento den forma di un protesta silencioso.

E protesta a sali for di ex-DOW, na unda esnan presente a bay bisti na preto pa mustra cu nan ta di luto pasobra Aruba a perde soberania.

Lidernan di sindicatonan SADA, SIMAR, SPA y SEPPA, hunto cu organizacion OPPA a cana hunto cu nan miembronan pa asina mustra cu nan ta cansa, nan no ta di acuerdo y ta exigi un solucion. Segun un di e lidernan, nan a entrega pa mas di dos aña caba y awo cu e situacion a mehora, nan tambe kier pa Gobierno kita tur recorte di salario. Gobieno su lema ta ser humano ta central, pero tin famia cu ya no por cumpli cu nan gastonan.

   E manifestantenan a dicidi di bay Aeropuerto pa entrega e manifiesto na Secretario di Estado di Reino, Alexandra van Huffelen.