Director di FADA Rhomyko Winklaar: Don't drink & drive!
ORANJESTAD (AAN)- Den entrevista cu DIARIO, Señor Rhomyko Winklaar, director di Fundacion Anti Droga Aruba (FADA), a comenta cu Amigo Didi ya ta parti di nos comunidad, y a bisa cu esaki ta un concepto pa haci hende responsabel encuanto consumo di alcohol.
“Amigo Didi ta consisti tambe di varios video, y el cuminza cu un campaña na 2016. Un campaña tambe cu nos a tuma over di paisnan grandi manera Hulanda y Belgica, na unda cu nan tin otro nomber. Ayanan e ta cay bao di campaña BOB, door di cual nan ta concientiza personanan den comunidad cu na momento cu nan ta bay sali asigna un hende pa hiba boso cas, etc. Manera bo sa, vooral den dianan di fiesta, tin si nos ta consumi alcohol kizas asina tanto cu despues nos no por para riba pia y no por stuur un auto tampoco, manera nos sa”, Winklaar a acentua.
El a agrega cu logicamente control di autoridad ta necesario, pero mester ta conciente cu alcohol tin hopi influencia riba con nos ta maneha nos mes curpa, y por haci cu nos perde cierto habilidadnan ora di stuur auto.
“Y eynan ta na unda nos, como Fundacion Anti Droga Aruba, mester para keto na esaki, mirando cu dianan di fiesta ta den porta. Nos tur ta sali sea pa un Kerst-dinner, tin fiesta ta tuma lugar, tin concierto, y ta normal cu nos kier pasa un momento ameno, pero esaki mester pasa naturalmente na un forma ameno”, Winklaar a señala.
El a agrega cu un hende cu sa cu ta bay bebe alcohol, busca un amigo Didi pa stuur p’e hib’e cas despues. No mester ta e mesun persona semper pero si bo tin varios amigo, cada un por haya su turno. “Pues, e conseho ta ‘don't drink & drive’. Nos di parti di FADA como nos personal y directiva, ta desea pueblo di Aruba feliz dianan di fiesta, y un feliz cambio di 2023 pa 2024. No lubida: bo bida ta bal hopi y bida di otro tambe ta bal hopi, pues ta conciente na momento cu bo ta consumi alcohol y subi tras di un stuur di auto” Rhomyko Winklaar, director di FADA a destaca.
