ORANJESTAD (AAN) – “Sero Ayo ta un parti di Aruba su historia, cu awo ta bay haya un atencion special”, Minister Presidente a expresa,
en conexion cu inicio di renovacion di Sero Ayo, unda el a coloca e prome baranca pa e trabaonan aki cuminza.
E dignatario a splica cu aña pasa, ora cu Aruba tabata saliendo di e prome ola di e pandemia, gobierno a tuma e decision cu ta bay concentra den un proyecto cu nan a yama “Aruba Outdoor Amenity Economy”.
“Actividadnan economico creativo y recreativo nobo, rond di e patrimonionan natural, social y monumental cu nos tin na Aruba. Nos a lanta un Comision na e momentonan ey cu ta consisti di representantenan di varios ministerio y el a haya e tarea dificil y proposicionnan, con nos por duna esaki bida.
E tipo di actividadnan aki ta concentra den desaroyo pafo; cu awendia ta mas recomendable y saludable tambe. E ta mas saludable pa nos comunidad y pa nos bishitantenan, y esaki ta e prome di e proyectonan”, e dignatario a duna di conoce.
Minister Presidente a expresa cu Ayo ta reconoci como un tesoro, no solamente e naturaleza pero specialmente un tesoro geologico y historico di Aruba, cu ta brinda oportunidad na nos hendenan, pa pasa dia pa recrea y conoce e aspecto historico di e tribunan indigena cu a biba akinan antes, y cu a haci uso di e patrimonio natural-geologico aki.
“Awe nos ta cuminza cu e trabaonan di renovacion su prome fase, y esaki ta encera e cura di tranche y tur rond di e sero y tambe unda tin e prome piedra poni; tambe e renovacion di e cabañanan pa bishitante e facilidadnan sanitario; e bañonan cu lo wordo renova. E di dos fase cu ta bin despues ta bay concentra den e entrada, pa hacie mas atractivo. Lo crea mas lugar di parkeo y tambe e caminda pa cana pa Ayo, cu hopi biaha ta dificil pa cana eynan, lo wordo drecha y adapta pa personanan den rolstoel tambe por drenta y disfruta di e parke” Premier Wever-Croes a agrega.
E dignatario a duna di conoce cu Minister Dangui Oduber y e team di ATA lo traha riba e panelnan di informacion nobo, pa asina na cada lugar iconico di e parke aki, pa splica kico cada un ta nifica.
“ Den e di dos fase aki tambe lo cuminza cu construccion di un galeria di arte y souvenirs; esaki ta e di dos meta importante di e proyecto aki. E lo yama ‘Cosecha, make in Aruba’ y e lo bira un tipo di showcase, exclusivamente pa nos artesanonan y artistanan local, por bende nan souvenirs” e mandatario a menciona.
E idea ta pa cada artesano y artista local haya un oportunidad husto pa por promove y bende su producto. Minister di cultura Xiomara Maduro, lo bay tin sesionnan informativo pa e artesanonan y tur hende cu ta interesa den e careranan creativo aki. Minister Presidente a bisa cu ta hopi tipo di souvenirs por wordo traha inspira den Ayo, y esey ta e di dos meta principal di e proyecto, Minister Wever-Croes a reitera.
