Debi na forma grosero con el a wordo trata:
Na Eerste Hulp el a haya test y diagnostico
ORANJESTAD (AAN) Siman a habri, y DIARIO a sigui ricibi yamada di ciudadanonan adulto mayor, relaciona cu nan experiencia cu docter di cas y nan asistentenan.
Riba Dialuna, un señora di 89 aña a comenta cu el a bira malo na April cu a pasa, y ora a yama oficina di dokter, su asistente a bise cu “no tin lugar”.
E pashent a bise cu e tin hopi dolor. E señora su yiu a bolbe yama y e asistente a bisa pa e bin su mainta 8’or. E pashent no por a cana di dolor, pero asina mes el a bay. Su yiu kier a drenta cu ne, y dokter a nenga p’e drenta. Y e Dokter a keda puntra si berdad esey ta e señora su yiu, y ripiti esey dos biaha, y esey ta incomprendible. E dokter hopi grosero a yama su yiu preto.
E señora a describi pa e dokter con e dolor cu e ta sinti ta, cu ni cana e no por a cana. Dokter a bis'e cu ta su tripa ta cera y e no por bay af. El haya 12 caha di un remedi pa bay baño, pero asina mes e dolor no a pasa y el a haya keintura hopi halto.
Un bisiña a hib’e Eerste Hulp y el a ricibi un hangua pa baha e keintura. Pa su mainta el a bolbe Eerste Hulp pa haci test, y a resulta cu e tin piedra na riñon y polyp cu ta haya infeccion.
Ainda e señora ta sinti dolor fuerte y ta bebiendo remedi di tera pa no bay cerca su Dokter di Cas mas. El a hasta yama 125 cu ta Telefon pa Adulto, y nan a aconseh’e pa busca un alternativa. E no por keda sin haya ayudo medico.
Reclamonan ta sigui drenta: E reclamonan aki aparentemente no ta drentando djis na DIARIO, sino na otro medio di comunicacion tambe.
Recien hasta e conocido anestesiologo, Dr. Posner (ex-Ministro), a comenta riba social media riba e reclamonan aki cu e tambe ta ricibi. Di hendenan cu ta yama Dokter pa haya cita, pero ningun hende ta contesta telefon.
El a indica cu e ta birando un problema serio na Aruba. Hendenan malo cu mester di dokter, pero asistentenan di Dokter no ta contesta telefon. Y si bo bay personal na Consultorio, nan ta bisa bo cu bo “mester yama na telefon”.
