Miosotis Tromp di FADA hopi contento:
*FADA kier encurasha mas negoshi pa sigui concientiza comunidad
ORANJESTAD (AAN) – Miosotis Tromp, Trahado Preventivo di Fundacion Anti Droga Aruba, den entrevista cu DIARIO a duna di conoce cu Amigo Didi a haya un borchi nobo na Sero Blanco. “Don’t Drink and Drive” ta e mensahe cu por mira for di leu y na ambos banda di e borchi, na leter grandi.
Miosotis a comenta cu e campaña di Amigo Didi semper ta pa concientiza comunidad, y normalmente, nan ta sak’e via social media y tambe den diferente campaña cu nan ta haci durante e aña.
Pa nan di FADA tabata un sorpresa ora cu e borchi di AMIGODIDI a presenta na e rotonde di Sero Blanco, ya cu ta un iniciativa di e stacion di gasoline mes, y na bista di un y tur!
Den e ocho añanan cu FADA ta bezig cu ne, nan a pusha semper pa e companianan por sigui encurasha loke ta e campaña, y den e caso aki Seroe Blanco ta un di e promenan cu a start cu esaki door di pone e borchi cu luz, visible na tur dos banda di e rotonde.
E borchi aki tin su historia tambe. Miosotis a papia cu e doño di e compania ken a conta cu e iniciativa a surgi despues cu tabata tin un accidente den e rotonde, di cual nan a sinti hopi duele ya cu tabata un familiar cerca di nan, y pa conmemora esaki y trece mas concientizacion pa no bolbe sosode, nan a keda cu e meta di sigui trece e campaña mas dilanti.
“Na comienzo nan tabata tin pinta na muraya pero ora nan a haci cambio na muraya pa propaganda, nan a dicidi cu nan ta bay pone e borchi mes den e rotonde p’asina e keda eynan”, Miosotis a duna di conoce.
El a agrega cu e borchi aki tin como dos pa tres siman, y e ta hay’e hopi great. “Ya caba tabata tin hopi reaccion, diferente mensahe cu ta hopi great, y sigur nos ta encurasha otro companianan y tambe luga na scol cualkier caminda cu bo kier aporta na esaki, sigur por haci esey door di contact nos na FADA. Nos ta duna bo informacion con pa yega na esaki y so & so, sigui trece e meta dilanti pa comunidad”, Miosotis Tromp a reitera.
