Señora Jurima Bryson a huramenta como e prome Ombudsman di pais Aruba

Prome Minister Evelyn Wever-Croes

ORANJESTAD(AAN): Diamars 1 di october 2024, Aruba ta conoce su prome defensor di pueblo den nomber di señora Jurima Bryson. Prome Minister Evelyn Wever-Croes remarca cu e dia aki ta un dia historico pa pais Aruba, mirando cu pa hopi aña, Fraccion di Movimento Electoral di Pueblo (MEP) den Parlamento a cuminsa e proceso pa Aruba por haya su prome ombudsman.

-E trayecto pa cu e ombudsman a cuminsa na 1997

Prome Minister a indica cu e trayecto pa cu un ombudsman a cuminsa na aña 1997, na momento cu señora Zulay van Poppel den Parlamento e tempo ey como miembro di Fraccion di MEP, a cuminsa cu e iniciativa pa bin cu un ombudsman, pero desafortunadamente no a logra keda cla cu e ley. Na aña 2009, Prome Minister, e tempo ey den oposicion, a tuma e ley aki over pa asina continua cu ne, pero lamentablemente no a ricibi sosten di e Gobierno e tempo ey di Gabinete Eman.

-Gabinete Wever-Croes a cumpli

Pa cu e siguiente eleccion, partido MEP, a pone ombudsman como un compromiso di campaña, y manera Gabinete Wever-Croes a sinta na 2017, a cuminsa traha riba e legislacion y organisacion di e ley aki, cu a ricibi e sosten di mayoria den Parlamento, aprobando asina e ley di ombudsman. Sinembargo, pa ancr’e den e constitucion no a logra conta cu e mayoria di voto pasobra oposicion a vota contra. Akinan a bolbe cambia e ley di ombudsman pa por haci tur cos operacional y pa despues vota pa nombracion di señora Jurima Bryson como ombudsman. 

Prome Minister a expresa cu e dia aki ta extra special, paso por a tuma nota den un reunion solemn di Parlamento, caminda señora Bryson a huramenta como ombudsman, cu tur esnan cu a sostene su nombracion y e leynan pa cu esaki, a duna mensahenan sumamente bunita y conmovedor.

-Gradicimento na tur esnan cu a haci esaki posibel

Prome Minister ta gradici fraccion di MEP den Parlamento, specialmente señor Edgard Vrolijk pa trek esaki di un forma hopi diligente y profesional, y pa a sa di guia e proceso pa awe nos ta asina leu. Tambe el a gradici señora Sahaira Kelly cu tabata "kwartiermaker" cu tabata encarga pa set up ful e oficina di e ombudsman y pa trek e proyecto. Danki na su diplomacia, conocemento, esfuerso y dedicacion, nos ta asina leu awe.

-Esnan cu a vota contra, awe ta mira cu esaki ta e miho decision pa Aruba

Importante tambe ta pa mira ken ta tur esnan cu a opone na señora Bryson su nombracion y pa cu e ley di ombudsman. Aki ta referi na señor Mike Eman, señora Marisol Lopez-Tromp, señora Gerlien Croes, y señor Miguel Mansur cu a vota contra e nombracion di señora Bryson y contra e leynan pa cu e ombudsman. Mester bisa si cu awe nan ta mira cu esaki ta e miho decision pa Aruba, dunando no solamente pabien sino tambe sosten na e ombudsman. E ta momento cu henter Parlamento a uni den sostene e instituto importante di ombudsman, cu ta e defensor di pueblo.

-Beneficio di ombudsman pa comunidad

Awor cu Aruba tin su ombudsman, abo como ciudadano por bati na porta di e ombudsman si bo ta sinti cu bo ta hayando un trato inhusto of si bo ta sinti cu bo no ta wordo trata igual. Tambe den caso di  discrimnacion of si ta wordo trata sin respet pa algo cu bo persona tin derecho riba dje.

Ombudsman tey pa defende e pueblo. Unabes un persona entrega un keho, lo cuminsa un investigacion, lo traha un conseho y lo mand’e pa Gobierno cu lo sigui e proceso segun e conseho di e ombudsman.

"Aruba ta e ultimo pais den Reino pa haya su ombudsman, p'esey awe mi ta asina contento. Mi kier a felicita señora Jurima Bryson, cu mi conoce como un bon abogado, cu conoce su leynan y cu ta un persona firme, pero cu empatia y un curason grandi. Nos a wak’e den compania di su famia awe riba e dia special aki. Mi ta desea tanto Jurima como su famia hopi sabiduria, pasenshi y exito den e trabou importante aki", Prome Minister a expresa.