Instruccion nobo di Procurador General
ORANJESTAD (AAN): Manera DIARIO a pone den articulo anterior, Procurador General di Aruba a caba di manda instruccion pa tur instancia envolvi, pa indica cu nan tin un cambio di maneho pa cu Violencia Relacional entrante Diamars 1 di Februari 2022.
“Violencia relacional” ta e palabra nobo cu ta wordo usa pa violencia domestico.
Segun Ministerio Publico, e punto di salida ta cu violencia relacional ta un problema den sociedad cu tin di bay trata na evita. Den e prevencion di esaki, e instancianan den cuido, di sector social, y di enseñanza ta hunga un rol lider. E contribucion na evita violencia relacional ta principalmente di aspecto represivo, esta den casonan caminda un persona cu no obstante tur medida preventivo, toch ta bay haci lo eroneo.
Den cuadro di enfoque hudicial pa violencia relacional, ta conta cu e tipo di violencia aki tin di wordo para y castiga!
Pesey semper e agresor tin di wordo deteni mesora y encarcela, den casonan di violencia relacional unda Polis mester a inverveni. Esaki ta conta tambe pa casonan unda e victima no kier duna keho, of despues e ta kita e denuncia. Den principio, un funcionario mes ambtshalve por haci persecusion.
Duna asistencia: Tambe Procurador General ta papia di duna asistencia na e victima y e agresor. Na comienzo di un caso y durante e investigacion, semper lo keda analisa si acaso a tuma suficiente medida pa cuida e seguridad directo di esnan envolvi y otronan.
Ora cu autoridad haya nan confronta cu violencia relacional ta importante cu ta start mesora pa brinda asistencia na e victimanan. Guia obligatorio y recepcion di e victimanan ta bay via di e.o. Bureau Slachtofferhulp, Fundacion Hende Muher den Dificultad, Departamento di Asuntonan Social, Voogdijraad y Bureau Sostenemi.
Debi na e situacion vulnerable di menornan di edad, tanto Polis y Ministerio Publico den e investigacion tin di persigui casonan di violencia relacional contra menornan, y tene cuenta cu e siguiente diferencianan compara cu ora un adulto ta e victima.
(1) E diferencianan den e posicion huridico di comienzo (e posicion ora cu un hende mes ta haci denuncia, vs. denuncia ta wordo haci na nomber di victima).
(2) E doble relacion di dependencia di menornan di edad (legal y social) compara cu e relacion hopi biaha unico di e victimanan adulto (solamente social).
(3) E (im)posibilidadnan di diagnostico den e investigacion medico di heridanan.
Un mucha ta ocupa un posicion special den violencia relacional, sea e ta victima of testigo. Den casonan asina unda ta haci investigacion y tin menor di edad envolvi, Polis tin di bay raporta esaki mesora na Bureau Sostenemi y tambe na Voogdijraad.
E mucha cu ta testigo di violencia relacional, tin di wordo considera como un victima den e enfoque. E regla cu ta valido aki ta cu muchanan cu ta testigo di violencia relacional, nan mayornan lo mas pronto posible tin di bay haya asistencia mas apropia necesario riba termino corto.
Tambe ta importante cu e victima ta wordo informa na forma adecuado con su caso ta andando. Den combatimento di violencia relacional, tin di bay evita cu e caso ta ripiti. Pesey ta necesario cu Daderhulpverlening na un punto hopi trempan tin di wordo integra den e enfoque penal di violencia relacional.
PG ta bisa tambe, cu Reclassering tin di wordo informa inmediatamente door di Polis di casonan di violencia relacional. Reclassering ta e link importante entre Ministerio Publico y Daderhulpverlening.
Ta pensa aki cu Daderhulpverlening mester ta mas dirigi riba reparacion di e situacion cu e agresor a crea, y dune punto y metodonan pa evita cu e ta bay ripiti mesun cos.
