Fundacion ADRA a celebra su Graduacion 2022:
ORANJESTAD (AAN) – Fundacion ADRA Aruba, a celebra e Graduacion-2022, di su Proyecto di Mayornan Hoben: “From Teenage Parents to Life Coach”, cual ta e di cuater graduacion.
Esaki ta un proyecto cu Fundacion ADRA Aruba a bin ta realizando pa e ultimo lunanan, empoderando hobennan cu na un edad young a bira mama den nos sociedad. E graduacion a tuma lugar na Aruba Adventist Academy San Nicolas.
E ceremonia a cuminza cu un oracion na encargo di señor Pablo Lake, sigui pa palabranan di bon bini tabata na encargo di señora Angelique Sambo, miembro di e directiva, ken a gradici tur presente, entre nan dos miembro di Parlamento, stakeholders, directiva di ADRA y prensa, ademas di e graduadonan y nan famia.
“Danki pa bini hunto pa celebra e graduacion di nos perlanan. Perlanan cu awe kier mustra mundo cu si, nan por!” El a gradici Dios y celebra cu perlanan, cu por tabata tin estorbo na comienzo pero cu awe kier bisa “nos ta precioso”. Seguidamente a toca e marcha pa e damanan cu a gradua drenta den e sala, na unda cada un di e ocho perlanan cu señora Sambo a menciona pa bin dilanti tuma nan certificado, a wordo ricibi cu aplausonan caluroso. Sambo a menciona cu nan a lucha y topa cu desafio, pero awor ta mustra cu nan por bira “Life Coaches”.
