ORANJESTAD (AAN): Corte den Promer Instancia ayera mainta a condena e homber H.(70) na 6 aña di prison pa a abusa di un mucha homber di 11 aña.
Via video conference e sentencia a tuma lugar caminda H. tabata den un oficina na KIA mientras cu den sala di Corte tabata Hues, Fiscal, abogado y familiarnan di e sospechoso y e victima.
EXIGENCIA DI FISCAL
Algun siman pasa tratamento di e caso a tuma lugar caminda Fiscal ta haya cu tin prueba di sosten. Tin un raport di dokter cu ta mustra cu J. a wordo abusa di patras. Fiscal a bisa cu H. su propio yiu ta bisa cu el a scucha H. bisa cu el a abusa di J. Fiscal a mustra cu na Juli 2021, H. a bay entrega su mes y a bisa cu e ta entrega su mes pa loke el a haci cu J. H. tabatin 70 aña y e mucha 11 aña. El a haci mal uso di e situacion y tabata dificil pa e victima por a bay for di esaki. Pa cu castigo tene cuenta cu casonan asina ta trece hopi dolor pa famia y shock comunidad. Ki castigo cu pidi lo no kita e dolor y sentimento di e victima. E victima ta keda afecta y e mama a mustra cu e victima ta bay tratamento. Di Januari 2021 pa Juni 2021 H. a abusa di su sobrino di 11 aña. Fiscal a exigi 6 aña di prison. Pa loke ta daño inmaterial, ta un hecho cu victima ta sufri daño. El a pidi pa aproba 5 mil florin y gastonan di abogado. E resto declara no admisibel lo por haci un caso civil.
SENTENCIA
Hues ta haya legalmente proba cu entre Januari 2021 y Juni 2021, e homber H. a penetra e mucha homber J.(11). Hues ta haya cu tin prueba di sosten. El a mustra cu e mucha a bisa cu H. a rek e den cas y pone man na su boca ora e tabata abusa di dje. Ta asina cu H. ta omo di e mucha.
El a bisa cu e mama a bisa cu el a ripara cu J. tabata actua straño. A haya carta cu bisa cu J. ta wordo acusa door di H. A confronta H. cu e carta y el a admiti. Raport di dokter ta mustra cu e mucha tin scheur na su parti atras. H. a entrega su mes na Polis y a bisa cu el a abusa di e mucha. Hues a tene cuenta cu seriedad di e caso, edad di e mucha, castigo cu Hof ta duna. Hues a bisa cu a subi castigo pa abuso di mucha. El a confirma exigencia di Fiscal y a condena H. na 6 aña di prison. E demanda di daño Hues a declara no admisibel.
