Seis docente experto di Finlandia ta bishitando Pius X School

ORANJESTAD (AAN): Siman a cuminsa cu e bon noticia, ora cu riba Dialuna, Pius X School di Dakota a ricibi docentenan procedente di Finlandia.

   Nan a haci e viahe transatlantico den cuadro di e programa di ‘Erasmus Plus’.  Danki na esey, 6 docente di Finlandia a yega Aruba pa asina bay haci algo special pa Pius X School.

   E docentenan a worde ricibi cu braza habri na Aeropuerto di Aruba, y despues a hiba nan pa scol.  Cabezante y docentenan di e scol na Aruba, ta spera cu lo por yuda nan logra nan meta di bishita.

   Y ora cu e docentenan Finlandes a yega na scol, nan a worde ricibi calurosamente door di docente- y alumnonan.  Tabatin borchi pa duna nan bon bini na e idioma di e docentenan.  Muchanan para riba tereno di scol, gritando y ta zwaai bandera di Finland.  Den klasnan, por a mira hopi trabao di arte cu e muchanan a haci ultimo simannan, den cuadro di Finlandia.

   A compronde cu e docentenan ta bin di scol basico Jokelan Koulu cu ta situa na Jyväskylä na Finlandia.  E docentenan a sinti cu nan a ricibi un bon bini caluroso na Aruba, y nan ta sinti nan mes cla pa e siman aki haya sa mas di e forma cu ta duna les na Aruba, haya sa mas di pueblo, y e cultura.

   DIARIO a compronde cu Diasabra venidero den oranan di mainta, ta turno pa casualidad pa Pius X School tambe haya su hardin di Agroforesteria.  Trabao lo start pa 7’or di mainta, y nan ta spera di por haya yudansa di boluntarionan den comunidad, incluyendo ex-alumno, mayornan, y hasta alumnonan cu ta cla pa bin yuda planta matanan di fruta y berdura.  E proceso aki lo finalisa pa 11:00 am, y tur hende ta bon bini pa bin yuda.  Bin cu bo handschoen, y kizas bo herment pa haci esaki mas facil.