Diez aña pasa ya medidanan pisa mester a wordo tuma pa Aruba --- *DIARIO a adverti sancionnan contra Rusia lo dal tur pais na mundo --- *E realidad di 22-2-“22 ta preocupante pa un mundo den tension total
ORANJESTAD (AAN) — E momento a yega pa tur instancia local asumi nan responsabilidad pa splica Aruba e realidad di e momentonan cu mundo ta pasa aden.
No por tapa solo cu un dede mas, mientras mundo ta basha abau y ningun sector na mundo ya por papia di stabilidad y mantene e siguransa cu nan planificacion pa hasta 2022 lo por wordo mantene.
Awe tur lider di comunidad riba nan tereno, tin un obligacion serio cu Aruba, cu ta splica e Pueblo cu mester prepara pa un futuro sumamente dificil manera tur factor ta duna prueba na e momentonan aki.
E fecha di awe sigur ta uno cu ta haya hopi atencion pa e cifranan 22-2-2022. Pero e speransa na tur parti di mundo ta, cu dia 22-2-’22 un milager por sosode pa na un forma abrupto yega un fin na uno di e situacionnan mas serio cu mundo a conoce for di final di Segunda Guera Mundial.
Loke ta psa na e momentonan aki na Rusia no ta afecta Rusia so, pero tur pais na mundo sea cu nan ta conciente of inconciente.
DIARIO na un forma concreto a atende cu e desaroyonan na Ukraine for di e prome momento y a adverti pa e resultadonan cu e lo tin den mundo cu pa asuntonan di negoshi no tabata conoce ni Oost ni West, pero tabata un totalidad.
Ayera tanto Merca como Union Europeo a cuminsa prepara pa introduci sancionnan contra Rusia cu lo mishi directamente cu economia mundial, manera informacionnan oficial di instancianan internacional importante a mustra.
Na momento cu Merca y Europeo introduci medidanan contra Rusia, comercio internacional lo sufri cu resultadonan directo pa companianan na Merca, cu ta produci articulonan cu na Aruba tambe ta subi mercado.
Prijs di gasolin y otro productonan petrolero tabata subi rond mundo ayera y tabata causa mas y mas inflacion pa un mundo, cu mester a atende cu Omicron y a pensa cu na 2022 lo a bandona teteno di problema.
Ora papia di mundo, sigur ta papia di Aruba tambe, cu na e momentonan aki mester atende loke ta pasa na mundo na prome lugar.
Cu Aruba ta den posicion financiero malisimo, Reino a bisa Aruba atrobe aunke Aruba mes mester tabata na haltura di su realidad for di diez aña pasa ora Mike Eman mes a splica Aruba cu e no por sigui baha OB manera ya el a haci na 2010.
Aruba tin un nivel sumamente halto di educacion y lidernan di tur sector na Aruba ta bon na haltura di e berdad financiero di Aruba, aunke tur hende semper ta prefera pa nan partido no ta esun cu mester bisa “mea culpa” manera ta pasa cu e partido di Mike Eman.
Pero na e momento aki, ni esaki ta importante. Loke si ta importante ta, pa realisa cu e mundo cu a wordo crea for di 1945, ta bini abou y cu mundo ta drenta un etapa sumamente pisa cu problemanan serio cu tur pais na mundo mester enfrenta.
Kico ta pasa cu petroleo? Con ta pone placa riba mesa pa cambio di clima? Con ta pone fin na Covid-19 cu ta bula di un nomber pa otro?
E pregunta mas serio ta, con 22-2-2022 ta habri y cera awe.
Mundo ta den estado di guera, cu tur resultado.
Ta deber di tur instancia pa prepara Aruba pa un situacion mundial serio cu lo afecta hasta e cantidad di cuminda riba mesa na e forma cu prijsnan ta sigui subi.
DIARIO lo sigui asumi e posicion cu su responsabilidad pa informa Aruba, ta exigi.
Awe Aruba mester ta contento cu ya Hulanda a presenta un plan di asistencia pa Aruba, cu tabata na haltura for di 2014 oficialmente, cu fiesta a caba.
Awor mester traha riba e plannan aki cu e speransa, cu mundo por haya un solucion pa e situacion serio cu mundo conoce na e momentonan aki y cu no por sconde pa Pueblo, cu mester ta bon informa!
