Herrick Henriquez --- ORANJESTAD (AAN): Director di Asociacion ATIA a indica cu nan tin algun workshop interesante na caminda.
Herrick Henriquez a bisa cu nan lo bin cu algo hopi positivo pa henter comunidad di entrepreneurship. ATIA lo bay tin un asina yama ‘Start Up Week’. Idea tras di esaki ta cu ATIA lo bay brinda informacion anto pa miembronan y tambe no-miembronan pa henter un siman largo cu diferente topico.
Dialuna 21 di Februari a cuminza cu topico ‘Permiso y con pa Set Up un compania, y finanziamento di companianan. Na esaki lo haya presentacion di Departamento DEACI, Notario Helmeyer, Aruba Bank, RBC Bank, y Qredits cu ta papia di financiamento y micro-financiamento.
Diamars 22 di Februari lo bay papia di “Tax y Accounting”, unda lo papia di e impuesto di BTW cu lo bay bin. Lo duna informacion encuanto esey, y tambe informacion practico unda tin di bay cuminza prepara pa esaki. E mesun dia aki tambe lo papia di Administracion di Small Business, e forma pa traha presupuesto, y un tiki di e importancia di Payroll.
Diaranson 23 di Februari lo bay papia di “Ley y Compliance”, cu ta importante pa asina elabora riba ley di labor, riba e reglanan pa terminacion, riba e contractnan cu ta importante pa hendenan compronde e contract cu ta drenta den dje. Lo papia di ‘Compliance’ cu no ta djis e asuntonan anti-labamento di placa, pero tambe corporate-compliance cu ta wordo duna door di un di e miembronan.
Diahuebs 24 di Februari lo papia di “Vision, Strategia, Branding y Marketing”, pues con bo ta trece bo producto for di un vision te na un concepto y producto final. Un compania progresivo, Balashi, ta bin mustra con nan a sali for di e concepto te na e magia cu nan a traha. Steven de Cuba lo bin papia di personal branding, y mas hende cu ta papia di otro tipo di mercadeo.
Diabierna 25 di Februari lo papia di “Digitalizacion y Pago Online”. Esaki ta un topico cu hopi hende kier sa di dje, specialmente e parti di futuro di digitalizacion y importancia di websites y automatizacion con por haci hopi proceso bira automatico, y lo tin Pay.aw y tambe Cx Pay cu lo bin splica nan plataforma di pago.
E cursonan aki lo ta tur dia for di 8:30 am te cu 12:30 pm, y ta inclui breaks cu coffie y tambe pasaboca.
Henriquez a splica cu e miembronan di ATIA por participa gratis. Esnan cu no ta miembro, por participa na esaki pagando un prijs hopi atractivo mes. Bo por paga “pa dia”, of busca un package di “tur cinco dia”, na un prijs aun mas atractivo. Ademas bo por agrega como add-on un participacion na e asina yama ATIA Business Mixer unda durante un cocktail event, ta haya chens di combersa cu demas miembronan di ATIA.
E idea principal di esaki ta pa ATIA keda vigila cual ta topiconan mas trendy den e mundo di comercio, y introducinan na miembro- y tambe no-miembronan como tayer.
