AFBA ta bati alarma:
*Ta birando difícil pa por opera of pa duna e mínimo calidad di servicio
ORANJESTAD (AAN): Pa basta tempo caba e sector di Alimento y Bebida mediante, Aruba Food and Beverage Association (AFBA), a drenta den conversacion cu diferente instancia y gobernante pa por yega na un solucion na e problema reinante den nan industria.
Pa hopi ta conoci cu na Aruba actualmente tin falta di personal of personal califica pa cierto puestonan di trabao den nos industria cua ta haci difícil pa por opera of pa duna e mínimo calidad di servicio.
AFBA tin riba nan website www.arubafoodandverage.com posicionnan disponibel pa basta tempo caba y cu practicamente no ta haya persona interesa of cu lo kier traha den Horeca, unda lo mester traha oranan nocturno o dianan extendi den weekend.
AFBA a logra e anja aki hunto cu Openbare Avondleergangen Aruba (OAA) pa cuminsa
cu un proyecto piloto pa encamina 17 studiante pa studia y drenta den e mundo laboral den nos industria. Pero esaki ta djis e comienzo cu no ta resolve e problema actual di trabao disponibel.
A la vez AFBA a bin cu e Job Fair na luna di Juni pa percura pa e comunidad Arubano por conoce e compañianan cu ta ofrece oportunidad pa nos hobenan den e mundo laboral. Aunkue AFBA ta kere den e iniciativa aki y lo continua cu esaki na 2024, por bisa cu e situacion a suaviza un poco na e momento ei, pero no a logra ocupa tur posicion laboral disponibel.
AFBA ta mira cu preocupacion e desaroyo di apertura proximo di diferente hotel cu lo ofrece mas puesto di trabao na un poblacion cu ya caba ta ocupa. Na e momento aki Aruba ta drentando den su temporada halto y e miembronan ta confronta ya caba e falta di personal pa atende e publico internacional y local cu un standard halto manera cu nan ta costumbra of cu ta spera di nan negoshi.
Segun mayoria di e miembronan ta haya cu un di e gran obstaculo ta e proceso di solicitud di permiso pa trabao pa persona califica cu ta na isla pero nan no tin un permiso valido pa trabao.
Pa complica e situacion un poco mas, actualmente por haya cita na DPL te cu luna di Februari 2024, y esei ta solamente pa duna e cita, mientras cu proceso di solicitud lo mester warda 4 o mas luna pa por haya informacion of aprobacion.
Ta confrontando cu empleadonan actual a cuminsa frustra ya cu nan por sinti nan mes overbelast cu trabao. A sinta na mesa cu diferente instacia pa mira con por yega na un mecanismo o formato cu por haci cu e proceso di solicitud di permiso pa empleado por cana un caminda mas fácil y mas cortico.
A ser priminti na AFBA solucionnan cu ainda no a materializa forzando e miembronan pa tuma decision, di pronto drastico, manera recorta ora di funcionamiento.
E Asociacion ta preocupa ya cu nan ta parti di e experiencia cu cada turista cu ta bishita Aruba ta spera ora e bin nos isla, y lo kier duna un bon servicio, calidad di cuminda y atención, pero si nos sigui cu e problema lo haci esakinan imposibel.
AFBA kier eleva nan peticion un bez mas na tur instancia pa por sinta hunto y yega pronto na un sistema pa soluciona e problema existente y logra e permisonan di un forma facil, menos tempo y na tempo.
