Scouting Aruba a reconoce Sebastian Boekhoudt pa su acto heroico

ORANJESTAD (AAN) - Recientemente a tuma lugar un emergencia na Baby Beach na unda algun turista a haya nan mes den problema den awa.

E personanan tabata apunto di hoga y mesora algun persona na tera a actua di forma atento y deligente pa tuma accion door di drenta awa y logra yega na e personanan aki, rescata nan y trece nan na tera. Despues di esaki otro personanan presente a sigui pa duna prome ausilio pendiente yegada di ambulance. Despues di esaki nan a wordo transporta pa ayudo medico mas avansa.

Un di e personanan cu a tuma accion di biaha ora di constata cu tin persona den peliger ta Sebastian -Boekhoudt kende ta un di e lidernan miembro di organisacion Scouting Aruba den Grupo Scout St. Paulus-Michael. Directiva a tuma nota di e informacion y relato di e incidente aki y asina a haya un splicacion detaya di kico tur a transcuri riba e diasabra dia 12 di Juni ultimo na Baby Beach y a bin na e desicion pa otorga na Sebastian e reconocemento special pa lidernan cu destaca durante un situacion di emergencia agudo den bista di peliger.

E reconocemento aki a wordo entrega na Sebastian dia 12 di Juli ultimo por medio di e insigne oficial, e certificacion y un plakaat. Directiva di Scouting Aruba ta masha orguyoso di nan lider kende a actua di forma deligente pa yuda un otro persona. Esaki ta meramente un di e tanto aspectonan cu un hoben ta siña den Scouting y ta un momento tan special ora ta mira esaki wordo practica den futuro ora nan ta adulto.