Sarpa y Triple-A convenci cu vuelonan nobo lo yuda cu reactivacion di economia

ORANJESTAD(AAN): Triple-A cu ta maneha y opera  Aeropuerto Internacional Reina Beatrix Diaranzon atardi a tene un conferencia di prensa, relaciona cu vuelonan comercial nobo cu ta bay wordo ofreci pa Sarpa Airlines.

Ta bay tin 4 vuelo semanal desde 15 di December entre Medellin y Aruba, regresando pa Baranquilla y tambe vuelonan for di Baranquilla pa Aruba regresando pa Medellin.

E vuelonan triangular aki lo crea un 200 asiento mas semanal for di Colombia pa Aruba.

“E servicio nobo aki lo amplia nos red di Latino America cu vuelonan pa Aruba for di Medellin y Barranquilla”.

For basta tempo caba aeropuerto di Aruba ta partner cu Sarpa via e vuelonan medico y cu awor e ta contento cu ta bay bin tambe vuelonan comercial, segun CEO di AAA Joost Meijs.

El a bisa cu e tin confianza cu e vuelonan adicional aki for di Colombia lo ta un exito.

Segun Meijs, esaki lo yuda tambe cu e recuperacion mas rapido di nos turismo y economia.

“E ta un mercado importante pa nos pasobra no solamente nos lo sirbi nos bishitantenan for di Colombia, sino tambe esnan cu ta bishita nan famia na Colombia y esnan di Colombia cu ta bishita nan famianan na Aruba”, segun e CEO di AAA.

SARPA lo opera e vuelonan for di nan base principal na Medellin cu nan Embraer 145-LR cu 50 asiento.

SARPA tin vuelonan for di Medellin pa otro ciudadnan Colombiano tambe manera, Pasto, Riohacha, Valledupar y Villavicencio. Tambe nan lo opera vuelonan for di Medellin pa Corsow.

Carlos Andres Mesa, Presidente & CEO di SARPA, tambe a hiba palabra durante e conferencia di prensa.

El a indica cu e ta contento cu e logro aki cu lo yuda cu reactivacion di economia di Aruba y tambe pa loke ta Colombia.

“Nos a biba momentonan dificil y definitivamente e conexion aereo ta parti di e reactivacion economico cu tanto nos ta purba logra den e region”.

Sarpa ta un compania cu mas di 41 aña di existencia riba mercado y tin dos linea di negoshi, esta un linea di charter y otro di air ambulans.

Durante e ultimo 18 añanan Sarpa na un manera historico a conecta cu Aruba, Boneiro y Corsow via air ambulans y salud, segun Mesa, kende a indica cu for di 2018 e idea a nace pa cuminza cu vuelonan comercial regular.

E pandemia a stroba e plannan, pero awor e vuelonan comercial a bira un realidad.

El a sigui bisa cu esaki ta un bunita oportunidad pa vuelonan no solamente di salud, sino tambe vuelonan pa haci negoshi, pa placer of pa cultura.