Santana di Cacho mester haya su atencion pa no bay fo'i man

Segun presidente di San Nicolas Business Association:

ORANJESTAD (AAN):  Errol De Freitas,  Presidente di San Nicolas Business Association (SNBA) a duna di conoce cu Santana di Cacho mester haya su atencion pa no bay fo'i man.

            El a declara cu ora di pasa e restaurant cu tin na Baby Beach, por ripara caba cu den e mangrovenan te na pabao di pia di Seroe Colorado por mira cuanto hende ta keda dera y dera. Nan ta pone borchi masha bunita pa reconoce unda nan mascota a wordo dera, pero no tin ningun borchi eynan cu ta bisa cu no mag di dera cacho mas.

            Canando den e area, a ripara cu ariba e beach, ariba e santo blanco, shirishiri di bestia ta sali y ta ripara con hende ta derando eyriba. Niun hende kier atende cu e problematica aki, a enfatisa.

            Segun de Freitas, akinan no ta papiando cu ta beachnan cu kier pa hotel. Esaki ta naturalesa y tin cu traha riba esaki. No por warda mañan. Mester busca e forma di haci esaki limpi.

            E presidente di SNBA ta menciona e opcion di traha un fosa comun. Akinan ta papiando di desaroyo parti pariba y e desaroyo aki mester ta controla.

            Pariba di brug tambe ta bay tin mester di polis, mescos cu e area di hotel, pa controla sino ta bay keda haya hende cu ta abusa di e libertad cu tin.

            De Freitas ta spera cu gobierno lo por pone atencion of cuminsa pone borchinan no solamente di 'no benta sushi' pasobra Colony a bira e dump nobo. Tur hende ta bentando sushi tur caminda.

            Mester tuma e pasonan necesario pasobra realidad ta cu e doñonan di e hotel cu ta na caminda, no ta otro aña e ta habri. E ta habri na December di e aña aki, a remarca.

            Recien, a bisa, tabata tin reunion cu director di Departamento di Medio Ambiente y a combersa riba esaki ya cu mester pa e lugar aki ta limpi pa tur hende por disfruta.

            Pa loke ta Santana di Cacho, a indica, mester pasa un ley y poni borchi cla y raspa pa hende por lesa na tur idioma. Na di dos, mester pidi tur hende na un manera civico pa pasa saca e restonan di nan cacho y haci un deal cu e funerarianan pa crema e cacho.

            E asunto di deramento di bestia ta cos di tur dia y tin cu busca maneranan civico pa atende cu e problema, Errol de Freitas a splica.