Santa Rosa a despedi di Jim Bello cu a baha cu pensioen

ORANJESTAD (AAN): Un brindis special tabatin na Santa Rosa, pa asina gradici e tan conoci Jim Bello pa su 32 di aña di servicio, y cu awor ta disfrutando di un dushi pensioen.

   Departamento di Agricultura, Cría y Pesca Santa Rosa riba Diabierna tabatin e placer di bisa danki na sr. Emiterio Antonio Bello pa su 32 aña di servicio y pa su pensioen bon mereci.

   “Jim” ta su nomber di cariño na Santa Rosa, y tur hende conoce tambe bao di e nomber ey. Un persona semper cordial y cu un sonrisa semper na cara. Un persona cu gusta su trabou di tur dia cual e ta eherce cu placer. Manehando e trucknan di awa y ta haci entrega di awa di dam na tur nos productornan local. Un persona cu no conoce e palabra “no” den su vocabulario. Kico cu bo puntre of pidi’e, semper e ta cla pa yuda y realisa e trabou. “Jim” a cuminsa ta operador di Bulldozer. Tambe manehado di truck di awa pa entrega di awa di dam pa nos clientenan productor. Hasi tereno limpi pa planta cu tractor y cualkier otro trabao cu ta rekeri ekiponan pisa, semper “Jim” ta para cla pa yuda.

   Jim Bello su carera na Departamento di Agricultura, Cria y Pesca, Santa Rosa a duna cuminza na dia 2 di October 1992. Su funcion e tempo ey tabata “onderopzichter 3de klasse como chauffeur di ekiponan pisa. Funcionnan cu el a eherce ta den transcurso di añanan cual a haya e siguiente promocionnan manera 1 di november 1995 “Onderopzichter 2de Klasse, sigui pa algun aña despues día 1 di november 2004 “Onderopzichter 1ste Klasse y dia 1 di november 2017 “Adjunct-Commies”.

   ​Despues di 32 aña di servicionan aki na Santa Rosa cual su fecha oficial di pension tabata 13 di december 2024 ultimo, awe nos a invita sr. Emeterio Antonio Bello miho conoci como “Jim” pa un brindis di despedida. Tur colega di Santa Rosa a para ward’e na entrada di Santa Rosa caminda pa ultimo biaha a maneha e Dump Truck di Santa Rosa. Bao di pito di truck y aplauso a ricibi’e awe. Por admira tambe e potret caminda Jim para na e truck D-283 cual truck di awa cu semper Jim tabata maneha.

   Nathalie Maduro director di Departamento di Agricultura, Cria y Pesca, Santa Rosa a hiba un discurso chikito contando su experiencia placentero cu Jim y a efectua un bunita regalo na Jim di parti di tur trahador.  Nan ta gradici tur trahador cu a coopera pa e bunita gesto na Jim.

   Na nomber di Minister demisionario, sr. Ursell Arends tabata presente sra. Jacky Feliciana kende a otorga un bunita plaquette di reconocimento pa su 32 aña di servicio y un pensioen bon mereci.

   ​Na final di tur discurso y recuerdonan inolvidabel cu Jim na momento di su trabou a sigui cu un brindis na su despedida di su 32 aña di servicio y pensioen cu pasaboca y bolo. Tambe el a haya un baki di fruta y berdura fresco cosecha aki mes na Santa Rosa.

   Awor Jim por bai disfruta di su pensioen bon mereci pero corda pasa hasi nos un bishita leu leu aki na Santa Rosa.

​“Jim disfruta di bo pensioen”.