Manera DIARIO a anticipa for di inicio di acuerdo Biden/Maduro
- Eleccionnan na Merca y Venezuela ta cuminsa manifesta nan mes
- DIARIO en espera di resultadonan cu e situacion nobo tin pa Aruba
ORANJESTAD (AAN) Na momento cu Presidente Mericano, Joe Biden, a logro pa medio di negociacionnan pa yega na un acuerdo cu Nicolas Maduro riba posicion di Maduro enfrente eleccion liber na Venezuela, DIARIO a bisa cu e realizacion di e acuerdo aki ta parti di un mundo di fantasia.
E hecho cu bou Presidente Joe Biden, a schrap e medidanan cu Merca a tuma contra dictadura di Maduro na Venezuela, pa DIARIO tabata un solamente un gesto cu lo mester a wordo hala atras mientras Venezuela a asegura su mes cu pa un tempo, e por a exporta su productonan.
Cu entrada di awe e areglo a pasa pa pasado despues cu Merca a dicidi cu Nicolas Maduro no a tene su mes na palabracionnan pa garantisa eleccionnan liber na Venezuela y no ta honra e principionan democratico cu a wordo acorda.
Esaki ta nifica cu for di awe, e sancionnan renoba di Merca lo afecta e economia di Maduro severamente y ya companianan Mericano cu ta atende cu Venezuela ta na haltura, cu nan mester cuminsa cera nan porta cu Venezuela di Maduro.
Maduro a priminti Biden, cu e lo respeta eleccion limpi cu oposicion real pa e eleccionnan cu mester wordo tene na Juli pa asina duna resultado cu ta base pa e gobierno “nobo” cu lo mester tuma mando di Venezuela.
Dia 31 di Mei, companianan Mericano cu entre otro ta atende cu Venezuela riba tereno di petroleo, mester descontinua nan relacion cu Venezuela.
Importante pa Aruba ta bira e situacion nobo cu ta surgi den porta di Aruba pero tambe si e medidanan di Merca contra Venezuela lo por tin resultado directo of indirecto pa Aruba.
Eleccionnan na Venezuela sigur den e tempo di conflictonan internacional, den cual e mihor aliado di Venezuela cu ta Rusia ta implica, lo ta sumamente importante pa Aruba sigur den e situacion nobo cu a surgi a base di e decision di Presidente Joe Biden.
Por a nota con durante ultimo lunanan riba anotacion petrolero e hecho cu no tabata tin sancion Mericano, cu awor ta bolbe, tabata favorabel pa Venezuela cu atrobe ta bolbe den un situacion sumamente dificil.
Mientrastanto ta spera cu Citgo tambe lo conoce desaroyo aunke Presidente Biden a refirma e proteccion cu Merca ta brinda Citgo a base di acuerdo cu Venezolanonan den exilio.
Sinembargo, ta spera cu Nicolas Maduro lo bay pone presion pisa pa reclama Citgo na Merca como propiedad di Venezuela cu e ta dirigi mientras companianan cu Citgo debe, tambe kier nan placa.
Un situacion sumamente interesante dilanti costo di Aruba, cu DIARIO ta sigui pa informa lectornan.
