Un seguro medico general pa 160 Mil habitante ta keda problema --- *Naturalesa y historia a entrega Aruba base pa nivel halto di salud --- *Exigencia fundamental di bon cuido medico ta peso grandi pa AZV
ORANJESTAD (AAN) —Salubridad Publico ta dicidi pa nivel di bida y pa crecemento di bida na un pais.
E problema mas grandi di Salubridad Publico na mundo ta, cu e tin mas experto cu cualkier otro fishi na mundo, aunke generalmente tin poco comprension pa e realidad cu Salubridad Publico no ta limita na cuido medico, cu ta basa su mes riba prevencion, riba reconocemento y tratamento di problema di salud na un nivel personal.
Salubridad Publico ta atende cu aspectonan nacional cu ta mishi cu salud di hende y tambe e base nacional pa pa preveni y duna asistencia medico.
Ora papia di tur aspecto nacional cu ta mishi cu salud di hende, Aruba mester gradici su Creador, pa condicionnan di bida cu naturalesa a entrega Aruba.
Clima di Aruba ta uno favorabel pa curpa y mente. Aruba no tin un naturalesa cu continuamente ta produci horcan, temblor, friu ni calor excesivo cu ta afecta bida di hende directamente pero tambe e calidad di bida di hende.
Historia a entrega Aruba un nivel halto di educacion pero tambe aspectonan cu ta mishi directamente cu salud di hende.
Aruba tin awa limpi pa bebe y pa mantene un grado halto di higiena. Hopi hende no ta sikiera realisa, cuanto problema falta di awa ta causa salud di hende.
Aruba no conoce e grado di pobresa, cu mester cualifica como misteria, cu ta brote di malesa no solamente debi na falta di cuminda saludabel, pero pa motibo di vivienda, higiena y tanto otro condicion cu miseria ta provoca.
Pueblo di Aruba ta ricibi educacion, cu ta haci cu hende por informa su mes y alcansa un nivel di bida, cu ta preveni malesa.
Educacion a entrega Aruba su expertonan cu por yuda den desaroyo total di e pais y den sector di Salud Publico.
Aruba ta busca solucion pa dump, mientras na cantidad di pais hende ta come loke nan haya na dump.
Na momento cu industrialisacion a bati na porta di Aruba, seguridad social a drenta cu paketenan di cuido medico, cu den transcurso di tempo a mehora.
E nivel halto di bida di Aruba, incluso e nivel halto di salud publico, a sostene economia di Aruba y a trece turista, cu a trece placa cu cual Aruba por a financia mas y mihor cuido medico.
Crecemento economico y Salud Publico ta depende di otro y ta tene otro den balansa.
Mundo politico a introduci AZV na Aruba. Un seguro medico general, cu mester a bira obligatorio pa evita cu e ta bati bancarota prome cu el a cuminsa existi.
Hulanda ta uno di e paisnan cu ta exigi tur persona cu ta bati na porta, cera un seguro medico. Pero nan por scoge den cantidad di fondo y compania, loke na Aruba no ta e caso.
Obligatoriamente 160 Mil persona ta parti di AZV, den cual cuido medico a wordo centralisa a bon y pa malo manera experencia a mustra.
Pa malo, pasobra Aruba no tabata cla pa AZV cu a crea speransa falso tambe. Tur hende a haya cuido medico, cu nan por a haya tambe si tur hende a wordo obliga na drenta un seguro medico priva, cu a bira un ramo economico cu a kibra ora AZV a drenta.
Awe e problema grandi di AZV ta keda, cu el a drenta manera un promesa cu tur hende ta haya cuido socialisa.
En realidad Gobierno a sigui absorba e grupo di “PP patient”, e grupo di SVB a bira AZV mescos cu e grupo cu tabata tin seguro priva.
E problema grandi di AZV ta keda, cu comunidad ta sigui spera loke AZV no por brinda, sigur den pandemia cu resultado directo y indirecto pa Cuido Medico.
Salubridad publico den su totalidad ta bay exigi mas den un clima cu ta cambia y un medio ambiente cu ta exigi inversion.
Parti di solucion ta sigur pa bay splica Pueblo e peso y e responsabilidad di tur hende pa AZV, e seguro obligatorio cu un comunidad chikito di 160 Mil persona mester carga financieramente den un tempo cu Salubridad Publico mester percura pa un nivel di bida, cu ta evita mas gasto pa Cuido Medico den futuro cu solo mas cayente y mas posibilidad pa calamidad den un economia mester crece pa crea fondo pa Salubridad Publico tambe!
