Posicion DIARIO riba menasa victoria di clima confirma
- Proyecto petrolero Alaska a afecta postura Biden den eleccion
- Citgo y su interes Ruso ainda bou proteccion presidencial Merca
ORANJESTAD(AAN)- Mientras na Europa, hydrogeno como fuente energetico ta sigui avansa y mescos cu na Hulanda por ehempel Alemania ta sigui inverti den e combustibel limpi, na Merca petroleo ta menasa di mancha e reputacion politico di Presidente Joe Biden.
Merca por bira e confirmacion di e posicion di DIARIO enfrente e menasa grandi cu economia mundial ta forma pa un posibel victoria di clima riba petroleo.
Pakico petroleo a cambia e panorama di economia mundial?
E contesta ta wordo duna na tur pais na mundo cu di un forma of otro a wordo beneficia di e resultado cu e industria petrolero tin pa economia, situacion financiero y social di e pais, cu di otro banda ta paga un prijs hopi caro pa un bon entrada.
Mientras Siglo 20 tabata progresa, Meteorologonan cu ta ocupa nan mes cu condicionnan di tempo, tabata e grupo cu a adverti pa e efecto di entre otro petroleo riba clima.
Mundo a wordo confronta cu e realidad cu sector di petroleo cu ta produci placa y entrada pa e pais, tambe ta produci gastonan enorme y peliger pa hende y su ambiente.
Na varios forma naturalesa y asina hende y su salud, a wordo efecto directamente dor di petroleo, cu a destrui beachnan famoso na mundo.
Gobiernonan cu a tuma medida na paisnan productor di petroleo of refineria, a evita loke por ehempel ta presenta su mes awor na Venezuela, cu tin un fondo di lama contamina pa produccion petrolero, cu ta destrui bida bou lama pero tambe beachnan y produccion di pisca como alimentacion di hende.
2021 a cera cu e promesa di un cantidad grandi di pais, cu nan lo sostene accion na fabor di clima y contra petroleo, cu DIARIO a splica lo bira sumamente dificil.
Guera di Ukraine por wordo considera directamente mara na e salida di petroleo y e recesion mundial cu a nace for di e ralley, e forma cu prijs di petroleo a aumenta e costo di bida.
Fin di e era di petroleo ta loke Gobierno di Joe Biden a sostene y hasta por bisa cu e posicion di Joe Biden a sigura su sosten como Presidente Mericano.
Na 2022 ya e posicion di Joe Biden den e crisis petroleo mundial a wordo cuestiona, ora un delegacion di Merca a bishita Venezuela.
Presidente Biden a pone e miembronan di gerencia di Citgo cu Nicolas Maduro a encarcela como topico mescos cu e buskeda di un formula pa yega na eleccion liber na Venezuela.
Petroleo pa un grupo grandi na Merca a keda e motibo pa cual Joe Biden lo a acerca Venezuela, cu tin como su aliado economico e compania di azeta Chevron Mericano, cu ta sostene e economia di Maduro tambe.
Ya e sosten cu Joe Biden a duna Chevron pa produci petroleo na Venezuela y manda petroleo pa Merca a causa critica serio cerca companianan di petroleo na Merca, caminda e compania di petroleo Venezolano, Citgo, ta keda bou proteccion di Merca, cu te April di 2023 a garantisa cu companianan cu tin placa hinca den Citgo, no por bende e compania pa haya nan placa.
Esaki ta haci cu e placa di participacion di Rusia tambe ta wordo cuida dor di Merca, cu hunto cu Rusia ta e productornan mas grandi di petroleo na mundo.
Alaska, e estado mas friu na Merca, ta productor grandi di petroleo, cu den pipanan enorme ta wordo transporta na Merca.
Esaki a bira un fuente economico di e pais, caminda e grupo cu ta proteha naturalesa den eleccion a haya sosten di Joe Biden den nan protesta contra e proyecto petrolero sigur den e mundo cu ta prepara pa despedi di petroleo.
E anuncio cu Presidente Joe Biden a bay di acuerdo cu mantencion di parti di e proyecto a cay manera un bom na Merca y ta wordo mira como un ehempel pa otro paisnan hala atras for di nan compromiso cu clima, mientras ya na tur parti inversionnan enorme ta wordo haci den entre otro hydrogeno.
E loke a pasa na Merca ta sostene e posicion di DIARIO for di prome momento cu a dicidi cu petroleo lo pasa pa pasado.
DIARIO a mustra riba e placa cu petroleo a produci y ta sostene e industria petrolero cu como enemigo di clima y medio ambiente ta yuda causa enfermedad, horcan, destruccion di naturalesa di cual hende ta depende.
