Segun Parlamentario Arthur Vallejo:
ORANJESTAD (AAN) — Parlamentario Arthur Vallejo a remarca den conferencia di prensa, di fraccion di MEP, cu pa motibo di tur loke ta pasando na Horacio Oduber Hospital, encuanto e contrato di renovacion y ampliacion cu el a cuestiona, e mocion cu el a presenta pa no fusiona ImSan cu HOH ta asina importante, pero mas bien traha cu otro den un samenwerking protocol, debi na e falta di orden cu por mira na HOH y demas stakeholders, den e proyecto aki.
“E trabao y esfuerzo haci den ImSan, unda nos ta wak un ImSan cu gana pa crece y ofrece Pais Aruba un salud di calidad, no por wordo stroba. Den e programa di Gabinete Wever-Croes-1, unda mi a fungi como Consehero den Gobernacion, mi ta kere cu sigur den e vision di Minister di Salud ImSan mester sigui crece den tur sentido y specialmente awor cu nos ta wak problemanan cu HOH.
Mi ta conseha Gobierno pa sigui pusha ImSan pa haya mas capacidad y ofrece e servicio cu ta premira, si acaso cosnan bay mas malo cu HOH”, Parlamentario Vallejo a señala.
El a agrega cu ImSan ta Aruba su salbabida, y si mire den e aspecto aki, mester pone man na obra pa interes general di nos poblacion, un biaha mas.
“Pasobra mi ta scucha tambe alto ehecutivonan den AZV, cu ta bisa cu nan no tin interes pa ImSan sigui crece, y segun mi, nan ta tremendamente ekivoca. Mi ta pidi atencion di e Minister di Salud tambe riba e tema aki, y pa e seguro medico di e pais aki. E unico sistema monopolistico aki ta den linea cu pensamento di nos mandatario y e pensamento di e poblacion en general, pa e salud y beneficio di pueblo Arubano”, Parlamentario Vallejo a reitera.
