ORANJESTAD (AAN): Diaranson atardi, Minister Ursell Arends a yama un conferencia di prensa unda a referi na e tema di medio ambiente pa asina referi na un 'National Ocean Policy'.
E mandatario a cuminsa dunando un actualisacion riba loke ta e situacion di medio ambiente. "Ya caba awe ta 65 dia cu mi a asumi e responsabilidad di e ministerio di naturalesa y pa loke ta trata esaki nos a bisa for di inicio cu nos mester bay trata naturalesa na un forma integral y esaki ta inclui tambe RWZI y Parkietenbos".
Riba e temanan aki a bin ta trahando den e 65 dianan aki. A bin ta traha riba e aspecto tecnico y e aspecto financiero.
Pa loke ta e parti tecnico ya caba tin bon bista di kico kier y unda kier bay. Y pa loke ta e parti financiero, esaki tambe ta mescos, Minister Arends a señala.
A identifica caba cu den e parti financiero tin capital internacional y di Hulanda atraves di COHO cu por financia e proyectonan aki. Pero na e momentonan aki tin cu convence 'politiek Den Haag cu ambos di e puntonan aki ta situacionnan critico cu mester atencion debido pa por yega na e financiamento pa realisa ambos di e proyectonan aki y duna nan un solucion structural, Arends a duna di conoce.
Hulanda ainda no ta convenci di e urgencia di esaki. Na e momentonan aki tin raportanan na disposicion cu ta ilustra e peliger y e urgencia pa loke ta trata e RWZI y tambe Parkietenbos, e causa negativo cu nan tin riba e bida marino, e mandatario a remarca.
Durante e rueda di prensa, Director di Directie Natuur en Milieu (DNM), Gisbert Boekhoudt a duna un presentacion pa asina ilustra kico ta e importancia y e impacto negativo cu tin na e momentonan aki door di ambos proyecto riba e bida marino.
