ORANJESTAD (AAN) – Rosaria Brown, ken ta yuda boluntariamente, cu e veld di basketball na Village, ta comenta cu apesar cu e situacion fisico di e cancha aki ta deplorable, asina mes e ta wordo uza toch, pa diferente grupo, diferente edad.
El menciona cu na December ultimo, IBiSA tambe a cuminza uza e veld di Basketball ora cu nan ta haci actividad y deporte, unda tur cos ta bayendo bon pero no mas cu, lamentablemente, e lugar ta deplorable.
“Nos djis ta pidi please ayudo, y whatever cu e muchanan a destrui’e awo ta algo nobo pa haci nobo y nos tin basta mayor cu ta willing. Manera por wak nos tin un speeltuin tambe cu semper ta cuida nechi, pero cu tempo tambe su material ta bay kibra pa solo, awa, etc. Mi tin otro speeltuin eynan cu dentro di poco mi ta bay cere pasobra ariba ya ta kibra y ta forma peliger y mi persona mes ta beheer di speeltuin. Mi persona ta cuida speeltuin tur di y ningun mucha ta kibre”, el a bisa.
Señora Brown a wordo puntra pa prensa, kico e ta pensa di lanta un stichting. El a contesta cu sigur cu esey ta necesario no solamente pa Village, pero pa tur bario na San Nicolas. El a bisa cu si habitantenan di casnan di pueblo, y tur e mayornan ta uni, nan por traha un Comision di Mayor cu por cuminza deal cu stichtingnan pa logra algo.
Señora Brown a menciona cu hopi biaha el a bati na porta di DOW pa e speeltuin pero te ainda e no ta haya hende ta bin pa dreche.
“E no ta solamente cu muchanan ta haci ferfelu. Mi persona ta bati na porta pa hopi tempo y te awe no a haya ningun ayudo. Pero si tur ta bay cu e mentalidad di ‘hei, e muchanan di antes’ ki ta bay para di e generacionnan nobo cu hopi ta keda bin y bay, bin y bay” señora Brown a señala.
E ta corda cu “tempo di su tempo” e tabata bay YMCA cu tabata ‘the best’ unda hopi actividad y deporte, tabata wordo organiza, pero tur cos ta muri cu tempo, e dama a bisa.
E ta kere cu e actividadnan aki mester bin bek, pasobra despues kico ta scucha? Cu muchanan ta bay den mal caminda…E dama a reitera cu na prome lugar ta keda na mayor pa atende y educa nan yiunan den tur cos, pero tambe si tin hende cu consenshi humano cu por duna un man y yuda cu materialnan, por fabor hacie.
