Hopi hende ta apoyando e decision aki! - ORANJESTAD (AAN): El a bira algo obligatorio na varios compania na Merca!
Tambe hopi Departamento di Gobierno Federal di Merca a haci esaki uno obligatorio, y por a nota cu na New York, tur empleado municipal mester ta vacuna prome cu 13 di September venidero. Estado di California tambe a haci esaki obligatorio pa tur empleado publico.
Den Caribe, ta conoci cu varios Hotel grandi na isla di Jamaica a exigi pa empleadonan ta vacuna, pa asina nan por promove nan propiedad cerca turistanan cu tur empleado ta vacuna. Otro compania y resortnan den Caribe tambe ta haciendo mescos, pa asina yuda promove y demostra e turistanan cu e isla y companianan ta safe.
Algun luna pasa, un cadena hotelero grandi na Aruba tambe a encurasha empleadonan pa bay vacuna y como recompensa tabata haya un suma di placa como recompensa.
APOYO PA ROMAR:
E siman aki a bira conoci, cu e agencia importador local di Romar Trading, tambe a cirula un carta unda ta duna un deadline di 6 September 2021 pa tur empleado tin tur dos vacuna contra Covid-19.
Por a nota cu mesora ta hopi hende a aplaudi e movimento aki. E empleadonan cu vacuna, ta reduci e chens drasticamente cu nan lo por bira malo of hasta muri di Covid-19. Contrario na e storianan yen fabula y falso cu vacuna ta mata hende na cantidad, a keda demostra cu esey no ta e caso. Bon mes cu hopi hende porfin ta habri wowo y ripara cu pa varios luna caba nan tabata sigui ciegamente tras di storianan original di Qanon y hendenan cu tur dia tin nada di haci sino djis inventa storianan bon hinca den otro di conspiracion.
Pa awor na Aruba, e maneho di vacunacion obligatorio contra Covid-19 na Romar Trading a cuminza oficialmente e siman aki, segun un carta firma pa e director y manda pa tur empleado.
A splica cu Romar Trading tin e deber pa mantene un lugar di trabao liber di peligro, y pesey a introduci e maneho pa salvaguardia salud di empleadonan, nan famia, cliente, y bishitantenan contra e virus mortal di Covid-19 cu por wordo evita significadamente cu e vacuna.
Como un di e distribuidornan mas grandi riba e isla, nan tin contacto diario cu mas di 300 persona pafo di e oficina. E ta den nan deber pa ta e ehemplo y di trata di proteha e empleadonan como tambe comunidad en general.
Romar Trading ta indica cu tur empleado tin e deber di presenta un prueba di vacunacion (doble dosis) contra Covid-19 prome cu 6 di September. Si acaso e empleado ta rekeri un excepcion debi cu e no por haya vacuna pa motibo medico, e por entrega esaki na miembro di staf di e compania.
“Nos kier encurasha tur nos empleadonan pa vacuna lo mas pronto posible,” e carta ta indica. E empleado cu no ta vacuna completo (double dosis) pa Dialuna 6 September 2021, lo no por presenta na oficina y lo sigui pa e fase di terminacion di contract laboral.
Por a nota cu hopi hende a apoya y sostene e decision di Romar Trading, cu a tuma un decision cu ta completamente pro-salud, logico, y sigur yuda e isla sali for di e pandemia.
